खंडाळ्यात आज
लाक्षणिक उपोषण
खंडाळा, ता. ३१ : तालुक्यातील शेती पाण्यापासून वंचित राहिलेल्या १४ गावांना शासकीय खर्चातून बारमाही पाणी मिळावे, या मागणीसाठी १४ गावांची पाणी परिषद, खंडाळा तालुका विकास प्रतिष्ठान, खंडाळा तालुका पाणी संघर्ष समिती व खंडाळा तालुका पाणी पंचायत यांच्या संयुक्त विद्यमाने उद्या (गुरुवारी) तहसील कार्यालयासमोर एक दिवसीय लाक्षणिक उपोषण करण्यात येणार आहे.
यासाठी तालुक्यातील व विशेषतः १४ गावांतील बहुसंख्य शेतकरी या आंदोलनात सहभागी होणार आहेत. यासाठी या संघटनेने प्रत्येक गावोगावी बैठक घेतली आहे. या उपोषणासाठी प्रथमतः पारगाव (ता. खंडाळा) येथील भीमाशंकर मंदिराजवळ उपस्थित राहण्याचे आवाहन केले आहे, तर येथून ही पदयात्रा शहरातील मुख्य रस्त्याने तहसील कार्यालयापर्यंत जाणार आहे. येथे एक दिवसीय लाक्षणिक उपोषण करण्यात येणार आहे, तरी सर्व शेतकरी बांधवांनी उपस्थित राहावे, असे आवाहन करण्यात आले आहे.
तालुक्यातील कण्हेरी, अतिट, कर्नवडी, घाडगेवाडी, लोहम, झगलवाडी, लिंबाचीवाडी, असवली, अंबरवाडी, पवारवाडी, हरिपूर, हरळी, धावडवाडी आणि घाटदरे ही १४ गावे पाण्यापासून वंचित आहेत.

-------------------------------