मंचर (पुणे) : आपल्या दोन मुलींना पोहायला शिकविण्यासाठी तलावात उतरलेल्या वडिलांचा पाण्यात बुडून मृत्यू झाल्याची घटना लांडेवाडी- चिंचोडी (ता. आंबेगाव) येथे घडली आहे. रवींद्र महिपतराव आढळराव पाटील (वय 39), असे मृत्यु झालेल्या वडिलांचे नाव आहे.  

लांडेवाडी- चिंचोडी गावाच्या हद्दीत तलाव आहे. उजव्या कालव्याच्या पोटचारीचे पाणी तलावात आले आहे. त्यामुळे तलाव पाण्याने भरलेला आहे. उन्हाळ्याचे दिवस असल्यामुळे काही जण पोहण्यासाठी येतात. रवींद्र आढळराव पाटील हे आपल्या शुभ्रा (इयत्ता दुसरी, वय 8), रुचिका (इयत्ता सातवी, वय 14) या दोन मुलींना पोहायला शिकवण्यासाठी तलावाजवळ आले. मुली काठावरच उभ्या होत्या. रवींद्र हे तलावात उतरून पोहत होते. पण, ते पाण्याच्या बाहेरच आले नाही. त्यामुळे मुलींनी आरडाओरड केला. 

पुण्याच्या इतर बातम्या वाचण्यासाठी येथे क्लिक करा

या मुलींच्या ओरडण्याचा आवाज एकूण परिसरात राहणारे पप्पू आढळराव पाटील, सचिन आढळराव पाटील व नंदी समाजाची दोन मुले (नावे माहीत नाही) मदतीसाठी धावून आली. रवींद्र आढळराव पाटील हे पाण्यात दिसत नव्हते. त्यामुळे त्यांचा पाण्यात शोध घेतला. त्यानंतर त्यांना तलावातून बाहेर काढून उपचारासाठी मंचर उपजिल्हा रुग्णालयात दाखल केले. पण, उपचारापूर्वीच त्यांचा मृत्यू झाल्याचे डॉक्‍टरांनी सांगितले.