पुणे, ता. २३ : अन्न व औषध प्रशासनाने (एफडीए) पुणे विभागात प्रतिबंधित अन्नपदार्थांची विक्री आणि साठवणूक करणाऱ्या चार आस्थापनांवर कारवाई केली. या मोहिमेत एक कोटी १८ लाख ४३ हजार ३६४ रुपये किमतीचा साठा जप्त करून सहा जणांना अटक केली आहे.
पुणे आणि पिंपरी-चिंचवड परिसरात प्रशासनाकडून विशेष तपासणी मोहीम राबविण्यात आली. या कारवाईत चार गुन्हे दाखल केले असून एका आस्थापनेला टाळे ठोकले आहे. तसेच २३ लाख रुपये किमतीची दोन वाहनेही जप्त केली आहेत.
पिंपरी येथील रसरंग आस्थापनेतून २९ हजार ५०० रुपये किमतीचा ५९ किलो खवा जप्त करण्यात आला. खेड येथील सहारा डेअरी प्रॉडक्ट्स येथून ६१ हजार ६०० रुपये किमतीचा एक हजार ८०८ किलो शाही स्वीट हलवा आणि एक लाख ६२ हजार २०० रुपये किमतीचा ८११ किलो ए-१ स्वीट हलवा जप्त केला. हा साठा ‘मिसब्रँडेड’ असल्याच्या संशयावरून ताब्यात घेण्यात आला आहे.
बिबवेवाडी येथील मंगल नॅचरोकेअर येथून २३ हजार ३१६ रुपये किमतीचे ३९.१५ किलो गाईचे तूप जप्त करण्यात आले. आंबेगाव पठार येथील गालखा देवी स्वीट्स येथून दिशाभूल करणारे दावे केल्याप्रकरणी सात हजार ५०० रुपये किमतीची ३० किलो सोहन पापडी जप्त केली. पिंपरी येथील गणेश स्वीट्समधून ३८ हजार ८० रुपये किमतीचा ११९ किलो मिठामावा जप्त केला आहे.