पुणे : सफाई कामगार महिलेस जादूटोणा करुन तिचे संपूर्ण कुटूंब उध्वस्त करण्याची धमकी देत तिच्याकडून एका महिलेसह तृतीयपंथी व्यक्तीने १५ हजार रुपये उकळल्याप्रकरणी त्यांच्याविरुध्द गुन्हा दाखल करण्यात आला. त्यानंतर समर्थ पोलिसांनी महिलेसह तृतीयपंथी व्यक्तीला अटक केली.

आणखी वाचा - महापौरांच्या कुटुंबातील आठ जण कोरोना पॉझिटिव्ह

सुनीता पवळे उर्फ सोनी (वय ४५, रा. नाना पेठ) या महिलेसह एका तृतीयपंथी व्यक्तीला अटक करण्यात आली. याप्रकरणी अनिता संदिप वाघेला (वय ३८)  यांनी समर्थ पोलिस ठाण्यात फिर्याद दिली आहे.

पोलिसांनी दिलेल्या माहितीनुसार, फिर्यादी अनिता वाघेला या सफाई कामगार आहेत. त्या पती व दोन मुलांसह डेक्कन परिसरात राहतात. त्यांचा एक मुलगा मागील वर्षी नववीत शिकत असताना त्याच्या मित्राने त्यास परिक्षेआधी फुटलेली प्रश्नपत्रिका पुरविली होती. त्यावेळी त्यांच्या मुलाने आई-वडीलांच्या परस्पर त्याच्या मित्राला घरातील दागिने दिले होते.

दरम्यान, या प्रकाराची माहिती फिर्यादी अनिता यांना मिळाल्यापासून त्या चिंताग्रस्त होत्या. त्यानंतर त्या साफसफाईचे काम करीत असताना त्यांची ओळख सुनिताशी झाली. त्यावेळी सुनिताने "मला देवी प्रसन्न आहे, मी जादूटोणा करुन तुझे दागिने मिळवून देते," असे सांगत अनिता यांच्याकडून तीन हजार रुपये घेतले. एक महिन्यानंतर सुनिताने फिर्यादीस गाठून "पौर्णिमेला देवीसाठी मांसाहाराचा नैवद्य द्यावा लागेल,त्यासाठी पाच हजार रुपये लागतील" असे सांगित पैसे मागितले.

पुण्याच्या बातम्यांसाठी येथे क्लिक करा

त्यावेळी फिर्यादीने पैसे देण्यास नकार दिला. त्यामुळे सुनिताने पैसे न दिल्यास तुझ्यावर देवीचा कोप होईल, जादूटोणा करुन तुझ्या कुटूंबाचे वाटोळे करील अशी धमकी देत फिर्यादीकडून पाच हजार रुपये घेतले. अशा पद्धतीने  सुनिता व एका तृतीयपंथीयाने फिर्यादीकडून वेळोवेळी १५ हजार रुपये काढून घेतले.

दरम्यान, आपली फसवणूक झाल्याचे लक्षात आल्यानंतर त्यांनी फिर्याद दाखल केली. या प्रकरणाचा तपास पोलिस उपनिरीक्षक विशाल मोहिते करीत आहेत.