पुणे : राज्य कर विभागातील निरीक्षक पदाची नोकरी मिळवण्यासाठी एकाने खेळाडू असल्याची बनावट कागदपत्रे सरकारी कार्यालयात देत फसवणूक केल्याचा धक्कादायक प्रकार उघडकीस आला. या प्रकरणी भारतीय तलवारबाजी महासंघाच्या माजी सचिवासह दोघांविरुद्ध येरवडा पोलिस ठाण्यात गुन्हा दाखल करण्यात आला. 

अशोक दुधारे, तुषार वसंतराव चौधरी (रा.पाटकुल, ता. मोहोळ, जि. सोलापूर) अशी गुन्हा दाखल झालेल्यांची नावे आहेत. त्यांच्याविरुद्ध फसवणूक व बनावट कागदपत्रे तयार केल्याचा गुन्हा दाखल करण्यात आला आहे. याप्रकरणी क्रीडा व युवक सेवा विभागाच्या पुणे कार्यालयाचे प्रभारी उपसंचालक विजय संतान यांनी येरवडा पोलिस ठाण्यात फिर्याद दिली आहे.

- गणेशोत्सवाच्या पहिल्याच दिवशी उडाली तारांबळ; गॅसचा पुरवठा बंद झाल्याने पुणेकर त्रस्त!​ 

पोलिसांनी दिलेल्या माहितीनुसार, चौधरी हा राज्य कर विभागात निरीक्षक पदावर नोकरी मिळवण्याच्या प्रयत्नात होता. खेळाडूंसाठी आरक्षण असल्याने चौधरी तलवारबाजीत प्रावीण्य मिळवल्याचे प्रमाणपत्र मिळवण्यासाठी प्रयत्न करत होता. त्याने बनावट प्रमाणपत्र बनवून भारतीय तलवारबाजी महासंघाचे माजी सचिव अशोक दुधारे यांना सादर केले. मात्र दुधारे यांनी प्रमाणपत्राची शहानिशा न करता तेच प्रतिज्ञा पत्र क्रीडा आणि युवक सेवा विभागाकडे सादर केले. 

- सराईत गुन्हेगाराचा खून करून त्यांनी घरामागे पुरला मृतदेह; दारू पिऊन द्यायचा त्रास​

दरम्यान, संबंधीत प्रतिज्ञापत्राची पडताळणी करण्यात आली. त्यावेळी चौधरी राष्ट्रीय पातळीवरील तलवारबाजी संघात महाराष्ट्राकडून सहभागी झाला नसल्याचे उघडकीस आले. या स्पर्धेत मणिपूर संघाने सुवर्णपदक मिळवले होते. मध्यप्रदेश आणि आंध्रप्रदेश संघाने अनुक्रमे रौप्य आणि कांस्य पदक मिळवल्याचे उघड झाल्यानंतर फसवणुकीचा प्रकार उघड झाला. चौधरीने बनावट कागदपत्रे सादर केली. तसेच या कागदपत्रांची पडताळणी न करता दुधारे यांनी प्रतिज्ञापत्र तयार करून दिल्याचे उघड झाले. सहाय्यक पोलीस निरीक्षक समीर करपे तपास करत आहेत.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)