बारामती : सुप्रसिद्ध अभिनेत्री अलका कुबल यांनी नुकतीच राष्ट्रवादीचे अध्यक्ष शरद पवार यांची सदिच्छा भेट घेतली. बारामतीतल्या "गोविंदबाग" या पवारांच्या निवासस्थानी ही भेट झाली. विधान परिषदेचे सभापती रामराजे निंबाळकर हेही या प्रसंगी उपस्थित होते. वर्षभरापूर्वी "काळूबाईच्या नावानं चांगभलं" या मालिकेच्या चित्रिकरणादरम्यान सेटवरील अनेक कलाकारांना कोरोनाची लागण झाली होती. या दरम्यान ज्येष्ठ अभिनेत्री आशालता वाबगावकर यांचे कोरोनामुळे निधन झाले होते. त्यावेळी शरद पवार यांनी सेट वरील सर्व कलाकारांची आस्थेवाईकपणे चौकशी करत भेटीचे निमंत्रण दिले होते.

त्या निमंत्रणानंतर अलका कुबल यांनी शरद पवार यांची भेट घेतली. मालिकांचे चित्रीकरण, कोरोनामुळे येणार्‍या अडचणी आणि आगामी प्रोजेक्ट संदर्भात या प्रसंगी चर्चा झाली. पवार यांच्याशी विविध मुद्द्यांवर चर्चा झाली, यात प्रामुख्याने मराठी चित्रपट सृष्टीतील निर्मात्यांनी ग्रामीण भागात चित्रिकरण करावे अशी सूचना पवार यांनी केली आहे.

पश्चिम महाराष्ट्रात अनेक ठिकाणी निसर्गाने मुक्तहस्ताने उधळण केलेली आहे, असा लोकेशन्सवर शूटींग होऊ शकते. ग्रामीण जीवनाचे रंग यातून समोर येऊ शकतात व ग्रामीण अर्थकारणालाही त्याने काही दिलासा मिळू शकेल, अशी पवार यांची यातील भूमिका होती. निर्माते-दिग्दर्शक समीर आठल्ये, अभिनेत्री प्राजक्ता दिघे, आमदार मकरंद पाटील, निखील घाडगे उपस्थित होते.