मंचर (पुणे) : लॉकडाउनच्या काळात कर्मचारी कपात करण्याचा पुरातत्त्व विभागाच्या मुंबई सर्कलच्या अधीक्षक पुरातत्त्व शास्त्रज्ञांनी काढलेला आदेश रद्द करण्याची खासदार डॉ. अमोल कोल्हे यांनी केंद्रीय सांस्कृतिक मंत्री प्रल्हादसिंग पटेल यांच्याकडे केलेली मागणी मान्य करण्यात आली असून हा आदेश रद्द करण्यात आला आहे. यासंदर्भात सर्वांत प्रथम बातमी शनिवारी (ता. 25) "सकाळ'मध्ये प्रसिद्ध झाली होती. 

पुरातत्त्व विभागाच्या मुंबई सर्कलचे अधीक्षक पुरातत्त्व शास्त्रज्ञ (Superintending Archaeologist) डॉ. राजेंद्र यादव यांनी 24 एप्रिलला कार्यालयीन आदेश काढून या कार्यालयांतर्गत येणाऱ्या उप मंडलातील (sub circle) हंगामी कर्मचाऱ्यांची कपात करण्याच्या सूचना देऊन या आदेशाची कडक अंमलबजावणी करण्याचे सूचित केले होते. त्यामुळे जुन्नरसह उपमंडलातील (sub circles) कर्मचाऱ्यांच्या नोकऱ्या धोक्‍यात आल्या होत्या.

आणखी वाचा- पुण्यात कोरोनाच्या संशयित रुग्णांबाबत घडला "हा' धक्कादायक प्रकार 

या कामगारांच्या भवितव्याचा विचार करून डॉ. कोल्हे यांनी तातडीने केंद्रीय सांस्कृतिक खात्याचे मंत्री प्रल्हादसिंग पटेल व पुरातत्त्व विभागाच्या महासंचालक उषा शर्मा यांना पत्र पाठवून कर्मचारी कपातीचा आदेश तत्काळ रद्द करण्याची मागणी केली होती. या मागणीची दखल घेऊन अखेरीस आज पुरातत्त्व विभागाच्या मुंबई सर्कलचे अधीक्षक पुरातत्त्व शास्त्रज्ञांनी काढलेला कर्मचारी कपातीचा आदेश रद्द करण्यात आला. 

पुण्याच्या इतर बातम्या वाचण्यासाठी येथे- क्लिक करा

पुरातत्त्व विभागाच्या कर्मचारी कपातीचा आदेश मागे घेतल्याबद्दल केंद्रीयमंत्री पटेल आणि महासंचालक शर्मा यांनी अतिशय संवेदनशीलता दाखवत हा निर्णय रद्द केला आणि कामगारांचे भवितव्य सुरक्षित केल्याबद्दल दोघांचेही खासदार डॉ. कोल्हे यांनी आभार व्यक्त केले आहेत.