कुरकुंभ : दौंड तालुक्यातील कुरकुंभ औद्योगिक वसाहतीतील सम्राट ( गोदावरी ) पेपर मिल कंपनीच्या गोदामातील पृष्ठयाला लागलेल्या आगीत संपूर्ण पुष्ठयाचा साठा जळून खाक झाला. मागील आठवड्यात एका बंद कंपनीत आगीची घटना घडली होती, त्यामुळे कुरकुंभ औद्योगिक वसाहतीतील केमिकल झोनमधील कंपन्यांचा सुरक्षेच्या उपाययोजनांचे पितळ पुन्हा एकदा उघडे पडले आहे.

कुरकुंभ औद्योगिक वसाहतीतील सम्राट पेपर मिल कंपनीतील त्याच्यासाठी त्याला गुरुवारी (ता. २५ ) पहाटे चारच्या सुमारास अचानक आग लागली. या आगीत गोदामातील संपूर्ण पुष्ठयाचा साठा जळून खाक झाला. वसाहतीतील अग्निशामक दलाला साडेचार तासानंतर आग आटोक्यात आणण्यात यश आले. मात्र तरीही थोड्याफार प्रमाणात सकाळी आग चालू होती.  आगीत कंपनीचे मोठ्याप्रमाणात नुकसान झाले असून आगीचे नेमके कारण समजू शकले नाही.

हेही वाचा - दशक्रियाची विधी पडली महागात! वारंवार सांगूनही नियमांची एैशीतैशी; परिसरात खळबळ

घटनास्थळी पोलीस निरीक्षक नारायण पवार यांनी कर्मचार्यासह भेट देऊन घटनेची माहिती घेतली. या आगीत कंपनीचे मालमत्तेचे नुकसान झाले असले तरी कोणतीही जीवितहानी झाली नसल्याची माहिती पोलिसांनी दिली. यासंदर्भात सकाळी उशीर पर्यंत कोणत्याही स्वरूपाचा गुन्हा पोलिसात दाखल झाला नव्हता. वसाहतीत मागील आठवड्यात 14 मार्च रोजी स्नेहा अँटिबायोटिक या  बंद कंपनीच्या आवारातील गवताला अचानक आग लागली होती. वसाहतीत आठ दिवसात आगीच्या दोन घटना घडल्याने केमिकल झोनमधील कंपन्यांच्या सुरक्षेच्या उपाययोजनांचे पितळ पुन्हा उघडे पडले आहे.

 हेही वाचा - स्‍वयंपाकगृह ते थेट 'CA'! गिरणी व्‍यावसायिकाच्या लेकीची उत्तुंग भरारी

दरवर्षी उन्हाळ्यामध्ये तापमान वाढल्याने कंपन्यांमधील केमिकल साठयांना आग लागण्याच्या  घटना वारंवार घडतात. केमिकल झोन असूनही कंपन्यांकडून व प्रशासनाकडून सुरक्षेच्यादृष्टीने ठोस उपाययोजना केल्या जात नाहीत. त्यामूळे परिसरातील कुरकुंभ, पांढरेवाडी, मळद, जिरेगाव, गिरीम इत्यादी गावातील नागरिकांच्या डोक्यावर सुरक्षेची टांगती तलवार लटकलेले आहे. सुरक्षेचे गांभीर्य लक्षात घेऊन औद्योगिक सुरक्षा विभागाने कंपन्यांचे फायर ऑडिट करून उपायोजना संदर्भात योग्य त्या सूचना द्याव्यात अशी मागणी परिसरातील नागरिकांकडून होत आहे.

(संपादन : सागर डी. शेलार)