वारजे/पुणे : कार्यालयाच्या बाहेर थांबलेल्या बांधकाम ठेकेदारावर हल्लेखोरांनी पिस्तुलातून गोळीबार केल्याची धक्कादायक घटना शनिवारी सकाळी सव्वा नऊ वाजण्याच्या सुमारास वारजे परिसरात घडली. हल्लेखोरांनी ठेकेदाराच्या दिशेने चार गोळ्या झाडल्या, मात्र तो तेथून टेकडीच्या दिशेने पळाल्याने सुदैवाने त्याला गोळी लागली नाही. गोळीबाराची ही घटना आर्थिक वाद किंवा पूर्ववैमनस्यातून झाली असल्याची शक्‍यता पोलिसांनी व्यक्त केली आहे.

रवींद्र सखाराम तागुंदे (वय 36, रा. वारजे) असे गोळीबारातुन बचावलेल्या बांधकाम ठेकेदाराचे नाव आहे. तागुंदे हा बांधकाम ठेकेदार आहे. तसेच तो जमीन खरेदी-विक्रीचा व्यवसायही करतो. त्याचे वारजे येथील वंडर फ्युचरा नावाच्या इमारतीमध्ये कार्यालय आहे. शनिवारी सकाळी सव्वा नऊच्या सुमारास तो कार्यालयात आला. मात्र कार्यालयात जाण्यापुर्वी तो काही वेळ कार्यालयाबाहेर थांबला होता. त्यावेळी त्याच्याबरोबर काही कामगार होते, मात्र काही वेळानंतर कामगार तेथून निघून गेले. त्याचवेळी मुंबई-बंगळुरू बाह्यवळण मार्गावरून दोन वेगवेगळ्या दुचाकीवरून चौघेजण त्याच्या कार्यालयासमोर आले. त्यांनी तांगुदेच्या कार्यालयासमोर दुचाकी लावली. त्यानंतर त्यांनी कार्यालयासमोर थांबून पिस्तुलातून दोन गोळ्या तांगुदेच्या दिशेने झाडल्या. गोळीबार झाल्यानंतर तागुंदे घाबरला, तो पाठीमागील बाजूस असलेल्या टेकडीच्या दिशेने धावत सुटला. त्यावेळी हल्लेखोरांनी त्याचा पाठलाग केला. त्यानंतर त्यांनी आणखी दोन गोळ्या पिस्तुलातुन झाडल्या. सुदैवाने त्यास गोळी लागली नाही.

दरम्यान, हल्लेखोर दुचाकीवरुन बाह्यवळणमार्गावरून वारज्याच्या दिशेने पळून गेले. या घटनेची माहिती मिळताच परिमंडळ तीनच्या पोलीस उपायुक्त पौर्णिमा गायकवाड, वारजे पोलीस ठाण्याचे वरिष्ठ पोलीस निरीक्षक शंकर खटके यांनी घटनास्थळी भेट दिली. तागुंदेची पाश्वभूमी गुन्हेगारी स्वरुपाची आहे. दोन खून प्रकरणात त्याची निर्दोष मुक्तता झाली आहे. त्याच्यावर पूर्ववैमनस्य किंवा आर्थिक वादातून हल्ला झाल्याची शक्‍यता गायकवाड यांनी व्यक्त केली. तागुंदेच्या कार्यालयाजवळ सीसीटीव्ही आहेत. हि घटना सीसीटीव्हीध्ये चित्रीत झाली असून पोलिसांकडून आरोपींचा शोध घेण्यासाठी पथके पाठविण्यात आली आहेत.