पुण्यात गेल्या काही दिवसांमध्ये गुन्ह्यांच्या घटनांमध्ये मोठ्या प्रमाणावर वाढ झाल्याचे दिसून येत आहेत. हडपसरमधील शेवाळेवाडी येथे ही घडली आहे. ठेकेदारीच्या वादातून शेवाळेवाडीत दिवसाढवळ्या गोळीबार झाला आहे. त्यामुळे शेवाळेवाडी परिसरात भितीचं वातावरण निर्माण झालं आहे, सोसायटी सिक्युरिटी कामगार पळविण्याच्या वादातून एका माजी सैनिकाने दुसऱ्या माजी सैनिक ठेकेदारावर दिवसाढवळ्या गोळीबार केला आहे.

यामध्ये ठेकेदार गंभीर जखमी झाला. याप्रकरणी हडपसर पोलिसांनी दोन आरोपींना अटक केली आहे. हे दोन्ही आरोपी एक माजी सैनिक असून दुसरा आरोपी त्यांचा मुलगा आहे. जयवंत खलाटे असे जखमी माजी सैनिकाचे नाव आहे. तर ऋषिकेश शेंडगे, सुधीर शेंडगे असे ताब्यात केलेल्या संशयित आरोपींची नावे आहेत. घटना घडल्यानंतर सहाय्यक पोलीस आयुक्त अश्विनी राख, वरिष्ठ पोलीस निरीक्षक संतोष पांढरे व गुन्हे टीमने भेट देऊन तपासाची संपूर्ण माहिती घेतली.

मिळालेल्या माहितीनुसार, आरोपी व फिर्यादी दोघेही माजी सैनिक असून दोघांचा सिक्युरिटी ठेकेदारीचा व्यवसाय आहे. आज(बुधवारी) सकाळी साडेनऊच्या सुमारास शेवाळवाडी येथील संपन्न होम सोसायटी समोर दोन ठेकेदारांमध्ये सिक्युरिटी कामगारांवरून वाद झाला. दोन सिक्युरिटी ठेकेदारांमध्ये या अगोदर दामोदर विहार येथे वाद झाला होता.

त्यानंतर शेंडगे घरी जाऊन पिस्तूल घेऊन आला आणि शेवाळेवाडीतील संपन्न होम्स सोसायटी समोर दोन गोळ्या झाडल्या, यामध्ये एक गोळी जयवंत खलाटे यांच्या पायाला लागली तर एक जमिनीवर लागली, यामध्ये खलाटे जखमी झाले असून त्यांना उपचारासाठी आर्मी रुग्णालयात दाखल केले आहे.

या गोळीबार घटनेमुळे शेवाळेवाडी परिसरामध्ये नागिरीकांमध्ये भीतीचे वातावरण निर्माण झाले आहे. पुढील तपास हडपसर पोलीस करत आहे