पुणे - कोरोना प्रतिबंधक लशीची दुसऱ्या आणि तिसऱ्या टप्प्यातील देशातील पहिली मानवी चाचणी पुण्यात भारती विद्यापीठ हॉस्पिटलमध्ये गुरुवारी (ता. २६) होणार आहे. 

ऑक्सफर्ड युनिव्हर्सिटी, अॅस्ट्राझेनेका आणि पुण्याची सिरम इन्स्टिट्यूट ऑफ इंडिया यांनी एकत्र येऊन लस निर्माण केली आहे. त्यासाठी चिंपांझीतील अँडिनो व्हायरसशी बायो इंजिनिअरिंगच्या माध्यमातून संयोग करून ही लस तयार करण्यात आली आहे. पुण्यात तयार होणाऱ्या लशीची पहिली चाचणी पुण्यातच होत असल्याचे या निमित्ताने पुढे येत आहे. 

पुण्याच्या बातम्या वाचण्यासाठी येथे ► क्लिक करा

कोरोना प्रतिबंधक लशीची दुसऱ्या आणि तिसऱ्या टप्प्यातील चाचणी होत आहे. त्यात पहिले शंभर स्वयंसेवक देशभरातून सहभागी होतील. त्यात त्यांना कोणते साइड इफेक्ट आहेत का, त्यांना आरोग्याबाबत कोणता धोका आहे का, याचे सविस्तर विश्‍लेषण आठ दिवसांमध्ये करण्यात येईल. यात चाचणीसाठी योग्य असलेल्या स्वयंसेवकांना लशीच्या चाचणीसाठी निवडले जाईल. पुढील पंधरा दिवसांमध्ये ही प्रक्रिया पूर्ण होईल. देशभरातील वेगवेगळ्या शहरांमधून एक हजार ६०० स्वयंसेवक यात सहभागी होणार आहेत. त्यापैकी या पहिल्या टप्प्यात शंभर जणांचा सहभाग असेल. त्यानंतर एक आठवड्याच्या फरकाने पुढील पंधराशे जण सहभागी होतील. 

ताज्या बातम्यांसाठी डाऊनलोड करा ई-सकाळचे ऍप

पुण्यातील चार रुग्णालये 
देशातील १४ केंद्रांमध्ये या लसीची मानवी चाचणी होणार आहे. त्यात पुण्यातील भारती विद्यापीठ हॉस्पिटल, ससून रुग्णालय, केईएम आणि जहांगीर रुग्णालयाचा समावेश आहे. 

भारती विद्यापीठ हॉस्पिटलचे वैद्यकीय संचालक डॉ. संजय ललवाणी म्हणाले, “चाचणीत सहभागी होणाऱ्या पाच स्वयंसेवकांची तपासणी केली आहे. त्यांचे कोविड चाचणीचे अहवाल मिळतील. त्यांची अँटिजेन आणि अँटिबॉडी चाचणीही केली आहे. या सगळ्याचे निगेटिव्ह रिपोर्ट आल्यानंतर त्यांना सध्या कोरोनाचा संसर्ग नाही आणि यापूर्वीही तो झालेला नाही, हे अधोरेखित होईल. त्यानंतरच त्यांना कोविशिल्ड ही लस देण्यात येईल.” 

देशात गेल्या दहा ते पंधरा वर्षांमध्ये आलेल्या लशीच्या चाचण्या भारती विद्यापीठात झाल्या आहेत, असेही त्यांनी स्पष्ट केले.