आंबेगाव : नव्याने महापालिकेत सामाविष्ट झालेल्या जांभूळवाडी तलावात तीन ते चार टन मासे मृत झाल्याची घटना नुकतीच घडली होती.त्यानंतर,पाटबंधारे विभागाकडून मृत माशांची विल्हेवाट लावण्यास सुरुवात कालपासून करण्यात आली आहे.परंतु,परिसरातील नागरिक मात्र दुर्गंधीने हैराण झाले आहेत.मृत मासे जेसीबीच्या सहाय्याने खड्डा खोदून पुरण्यात आले.

तलावात वारंवार अशा घटना घडत असल्याने स्थानिकांना नाहक त्रासाला सामोरे जावे लागते आहे.त्यावर कायमचा तोडगा काढणे गरजेचे आहे. पाटबंधारे विभाग हा मुख्यत्वे शेती सिंचनासाठी काम करत असल्याने अशा घटना घडल्यानंतर त्यावर विभागाकडून कार्यवाही होण्यास दिरंगाई होते.

शिवाय पाटबंधारे विभागाकडून मनुष्यबळ कमी आणि संबंधित यंत्रणाही नसल्याने कार्यवाहीस दिरंगाई होते आहे. स्थानिकांनी पाटबंधारे विभागाला माहिती कळविल्यानंतर जेसीबीच्या सहाय्याने खड्ड्यात पुरण्यास सुरुवात केली. यावेळी ॲक्टिव्ह फाऊंडेशनचे कार्यकर्तेही सहभागी झाले.