शिरूर (पुणे) : शिरूर तालुक्‍यातील रांजणगाव "एमआयडीसी'तील कारेगाव, ढोक सांगवी, रांजणगाव परिसरातून मध्य प्रदेशात पायी जाण्यासाठी सुमारे पाचशेवर कामगार मध्यरात्री एकत्रितपणे रस्त्यावर उतरले. त्यामुळे आणि ते कोणाचेही ऐकण्याच्या मनःस्थितीत नसल्याने पोलिस व प्रशासनाची काही काळ धावपळ उडाली. दरम्यान, आमदार अशोक पवार यांनी या कामगारांशी संपर्क साधून, "तुम्हाला तुमच्या प्रांतात पोचविण्यासाठी प्रयत्न करू,' असा दिलासा दिल्याने ते शांत झाले. 

शिक्रापूरमधील चार जणांचे रिपोर्ट आलेत असे... 

लॉकडाउनमुळे गेल्या 25 मार्चपासून कामधंदा नसल्याने व पुढेही लॉकडाउन वाढतच चालल्याने हवालदिल झालेले सुमारे पाचशे ते सहाशे कामगार रविवारी (ता. 3) रात्री उशिरा पायी निघाले होते. मध्यरात्री दीड वाजता सतरा कमानी पुलाजवळ त्यांना पोलिसांनी अडविल्यानंतर ते आक्रमक झाले. त्यामुळे अधिकची पोलिस कुमक बोलवावी लागली.

आमदार पवार, माजी नगरसेवक दादाभाऊ वाखारे यांनी त्यांच्याशी संपर्क साधून शांतता राहण्याचे आवाहन केले. प्रांताधिकारी संतोषकुमार देशमुख, तहसीलदार लैला शेख, पोलिस निरीक्षक प्रवीण खानापुरे यांनी कामगारांची भेट घेऊन त्यांची समजूत घातली. दरम्यान, सोमवारी या सर्व कामगारांची शिरूर, तर्डोबाची वाडी व न्हावरे फाटा येथील मंगल कार्यालयात राहण्याची व भोजनाची व्यवस्था करण्यात आली. 

पुण्यातील इतर बातम्या वाचण्यासाठी येथे क्लिक करा

कंपन्या बंद असल्याने हाताला काम नाही, जवळ जे होते ते संपले, आता खायला देखील काही नाही, खोल्यांचे भाडे थकल्याने घरमालक खोल्या खाली करण्यासाठी तगादा लावतात, आम्ही कसेही निभावून नेतो, पण मुलाबाळांचे हाल पाहवत नाहीत. त्यामुळे आता घरी जाण्याशिवाय पर्याय नाही, अशा प्रतिक्रिया या कामगारांनी व्यक्त केल्या. 

रांजणगाव एमआयडीसी परिसरातील कामगारांचा सर्वे केला जात असून, मध्यप्रदेशात जाऊ इच्छिणाऱ्या कामगारांची यादी तयार केली जात आहे. 
- लैला शेख, तहसीलदार, शिरूर