पुणे - महापुरामुळे सांगली व कोल्हापूर जिल्ह्यांमध्ये लाखो नागरिकांचे संसार उघड्यावर आले आहेत. त्यांच्या दुःखावर मदतीची फुंकर मारत मुस्लिम बांधवांनी बकरी ईद साजरी केली. यानिमित्त जीवनावश्‍यक वस्तू, कपडे या माध्यमांतून पूरग्रस्तांना मदत पाठविण्यात आली.  

‘ईद -उल अजहा’ म्हणजेच ‘बकरी ईद’निमित्त सकाळी सव्वानऊ वाजता गोळीबार मैदान येथील ईदगाहवर मुस्लिम बांधवांनी नमाजपठण केले. लहान मुलांसह हजारो मुस्लिम बांधवांनी नमाजपठण करत ‘अल्लाह’कडे आशीर्वाद मागितला. नैसर्गिक संकटात सापडलेल्या मानव जातीचे रक्षण कर, आम्हाला मदत कर, आमच्यावरील संकट टळू दे, असे साकडे या वेळी घालण्यात आले. नमाज पठणानंतर एकमेकांच्या गळ्यात पडून ईदच्या शुभेच्छा देण्यात आल्या. 

शहरातील २५० मशिदींमध्ये सकाळी साडेसहा ते साडेदहा या वेळेत नमाज अदा करण्यात आली. त्यानंतर मुस्लिम बांधवांनी बकऱ्यांची कुर्बानी दिली. नातेवाईक, गोरगरिबांना त्याचे वाटप करण्यात आले.

गोळीबार मैदानासह शहरातील विविध मशिदींमध्ये नमाज अदा करण्यात आली. या वेळी पूरग्रस्तांना मदत करण्याचे आवाहन करण्यात आले. त्यानुसार शहरातून कोल्हापूर, सांगली भागांतील पूरग्रस्तांसाठी मोठ्या प्रमाणात मदत पाठविण्यात आली. 
- रफिउद्दीन शेख, सरचिटणीस, हिलाल कमिटी (चाँद कमिटी)  

‘बकरी ईद’ला आम्ही कुर्बानीसाठी जो बकरा घेतो त्यामध्ये बचत केली. त्यातून जमा झालेली सुमारे दीड लाख रुपयांची मदत कोल्हापूर, सांगली येथे पाठविण्यात आली आहे.  
- यासीन शेख, सचिव, बंधुभाव भाईचारा फाउंडेशन