मोरगाव, ता. १४ : पावसाळ्याच्या पार्श्वभूमीवर डेंग्यू व मलेरियाचा धोका टाळण्यासाठी लोणी भापकर येथील न्यू इंग्लिश स्कूल आणि जिल्हा परिषद प्राथमिक शाळा परिसरात प्रतिबंधात्मक उपाय म्हणून फॉगिंग करण्यात आले. सुपर ट्रेकर्स वेल्फेअर ट्रस्ट आणि मॅजेस्टिक लँडमार्क्स यांच्या वतीने हा उपक्रम राबविण्यात आला.
शाळा परिसरात डासांचा प्रादुर्भाव वाढू नये आणि विद्यार्थ्यांना सुरक्षित शैक्षणिक वातावरण मिळावे, या उद्देशाने हे फॉगिंग करण्यात आले. मॅजेस्टिक लँडमार्क्स या कंपनीच्या सहकार्याने सुपर ट्रेकर्स वेल्फेअर ट्रस्टने यासाठी पुढाकार घेतला. ग्रामीण भागातील विद्यार्थ्यांच्या आरोग्यासाठी राबविलेल्या या सामाजिक उपक्रमाचे परिसरात कौतुक होत आहे.
या उपक्रमासाठी सहकार्य केल्याबद्दल मॅजेस्टिक लँडमार्क्सचे संचालक मनीष माहेश्वरी, संजय मेहता, राहुल मुंदडा, व्यवस्थापक अभिषेक जैन आणि गिरीराज सदानी यांचे ट्रस्टच्या वतीने आभार मानण्यात आले. ‘‘विद्यार्थ्यांच्या आरोग्याची काळजी घेणे ही समाजाची सामूहिक जबाबदारी आहे, याच भावनेतून हा उपक्रम राबविला,’’ अशी माहिती सुपर ट्रेकर्स वेल्फेअर ट्रस्टचे प्रवीण भापकर यांनी दिली. भविष्यातही असे सामाजिक उपक्रम राबविण्याचा मानस ट्रस्टने व्यक्त केला आहे.

लोणी भापकर (ता. बारामती) : न्यू इंग्लिश स्कूल व जि. प. प्राथमिक शाळेत फॉगिंग करताना टीम.