पुणे - कोरोना परिस्थितीत नागरिकांना घरबसल्या गरमागरम आणि स्वादिष्ट पदार्थ खाता यावे, म्हणून फूड डिलिव्हरी बॉय रस्त्यावर आहेत. मात्र, कामावर गेल्यानंतर देखील सध्या ऑर्डर कमी झाल्याने त्यांना पुरेसे पैसे मिळत नाही. त्यामुळे जेवण पुरविणाऱ्या या मुलांवर उपासमारीची वेळ आली आहे. 

ताज्या बातम्यांसाठी डाऊनलोड करा ई-सकाळचे ऍप

पुणे आणि पिंपरी-चिंचवड शहरात ऑनलाइन फूड डिलिव्हरी करणाऱ्या कंपन्यांमध्ये सुमारे 25 हजार डिलिव्हरी बॉय कार्यरत आहेत. त्यातील जवळपास तीन हजार मुलेच कामावर असून मास्क वगळता त्यांना सुरक्षेचे कोणतेही साधन पुरविण्यात आले नाही. मात्र, घरी थांबलो तर उदरनिर्वाहासाठी पैसे कुठून आणायचे, असा प्रश्‍न त्यांच्यासमोर निर्माण झाला आहे. यामुळे ते जीव धोक्‍यात घालून कामावर येत आहेत. 

डिलिव्हरी बॉयला एका ऑर्डरसाठी 20 ते 30 रुपये मिळतात. पूर्वी आठवड्याचे सहा ते आठ हजार रुपये मिळत. मात्र, सध्या दोन हजार रुपये देखील मिळणे अवघड झाल्याचे या मुलांनी सांगितले. कंपन्यांचे याकडे दुर्लक्ष होत असल्याचे दिसून येत आहे. 

पुण्याच्या बातम्या वाचण्यासाठी येथे ► क्लिक करा

पेट्रोलचा खर्च वाढला 
कोरोनामुळे शहरातील अनेक रस्ते बंद केले आहेत. त्यामुळे डिलिव्हरी देण्यासाठी पर्यायी रस्त्यांचा वापर करावा लागतो. परिणामी अंतर वाढत असल्याने पेट्रोल खर्च वाढला आहे. मात्र, डिलिव्हरीसाठी त्या तुलनेत पैसे कमी मिळत असल्याचे या मुलांनी सांगितले. 

कॅश वापरायला मिळत नाही 
संसर्ग टाळण्यासाठी रोख रक्कम हाताळू नये, असे निर्देश कंपन्यांनी दिले आहेत. त्यामुळे ग्राहकांकडून ऑनलाइन पैसे घेण्यात येत आहेत. पूर्वी रोख रक्कम घेण्यात येत. त्यामुळे ते पैसे काही दिवस पेट्रोल किंवा इतर खर्चासाठी वापरता येत होते. मात्र, आता पगार होण्यासाठी गुरुवारची वाट पाहावी लागते. दैनंदिन खर्चासाठी प्रत्येक डिलिव्हरी बॉयला एक हजार रुपये द्या, अशी मागणी आम्ही केली होती. मात्र, ती फेटाळण्यात आल्याचे धनंजय निंबाळकर यांनी सांगितले. 

किराणा व पैसे दोन्ही संपले 
कोरोनामुळे मार्चनंतर मी कामावर गेलो नाही. सध्या माझ्या घरात असणारा किराणा आणि खिशातील पैसे संपले आहे. पत्नी, आई आणि दोन मुले असलेले कुटुंबात मी एकटाच कमावता आहे. या परिस्थितीमुळे माझे कुटुंब हवालदिल झाले आहे, असे डिलिव्हरी बॉय अजय भांडेकर यांनी सांगितले.