इंदापूर - पुणे- सोलापूर राष्ट्रीय महामार्गावर (Pune Solapur National Highway) इंदापूरपासून (Indapur) दोन किलोमीटर अंतरावर सरडेवाडी (ता. इंदापूर) येथे व्यवहारे पेट्रोलपंपाजवळ सोमवारी (ता. ७) दुपारी तीन वाजता ईरटिगा मोटार टायर फुटून विरुद्ध दिशेच्या बोलेरो गाडीस जाऊन धडकल्याने (Accidnet) झालेल्या भीषण अपघातात चार जण जागीच ठार (Death) झाले. (Four Death in Accident near Indapur)

या अपघातात बोलेरो गाडीतील अविनाश कुंडलिक पवार (वय ३२), गणेश पोपट गोडसे (वय ३४), बाळासाहेब चांगदेव साळुंखे (सर्व रा. गुरसाळे, ता. पंढरपूर, जि. सोलापूर) व ईरटिगा गाडीचा चालक ज्योतिराम सूर्यभान पवार (वय ३०, रा. उलवे जि. रायगड) हे जागीच ठार झाले.

सोलापूर महामार्गावरून सोमवारी दुपारी तीन वाजण्याच्या सुमारास बोलेरो गाडी (क्र. एमएच १३ एझेड ३९०१) पुण्याकडून सोलापूरकडे निघाली होते. यामध्ये तीन प्रवासी होते; तर ईरटीगा मोटार (क्र. एमएच ४६ बीई ४५१५) सोलापूरकडून पुण्याकडे भरधाव निघाली होती. इंदापूरजवळील व्यवहारे पेट्रोल पंपाजवळ ईरटिगाचा टायर फुटल्याने ही गाडी दुभाजक तोडून बोलेरो गाडीला जाऊन जोरात धडकली. या अपघातात बोलेरोमधील तिघेही आणि ईरटिगा चालक जागीच ठार झाले.