शिक्रापूर : बुरुंजवाडी (ता.शिरूर) येथील ग्रामस्थांनी इयत्ता सातवी शिष्यवृत्ती परीक्षेत उत्तम निकाल लागल्याने खूष होऊन सोमनाथ सातव गुरुजींना चारचाकी भेट दिली. सरपंच कावेरी नळकांडे व उपसरपंच नानासाहेब रुके यांच्या हस्ते गाडीची चावी नुकतीच सातव गुरुजींकडे सुर्पूत केली.

बुरुंजवाडीची इयत्ता सातवी व चौथी शिष्यवृत्ती परीक्षा गुणवत्ता यादीत जिल्हा-राज्यात चमकण्याची परंपरा चांगली आहे. यालाच अनुसरून चालू वर्षी इयत्ता सातवीच्या परीक्षेत शाळेतील पाच मुले जिल्हा गुणवत्ता यादीत चमकली.

याच पार्श्वभूमिवर ग्रामस्थ, पालक यांनी गुरुजींवर खूष होऊन त्यांना चारचाकी भेट देण्याचा निर्णय घेतला व गाडी गावात येताच सरपंच कावेरी नळकांडे, उपसरपंच नानासाहेब रुके, बलराम पतसंस्थेचे मुख्य सचिव विजयराज टेमगिरे, विलास नळकांडे व शाळा व्यवस्थापन समितीचे अध्यक्ष राजाराम नळकांडे यांचे हस्ते गाडी प्रदान करण्यात आली. या कार्यक्रमात गुरुजींचा विशेष सन्मान माजी सरपंच सुशीलकुमार रुके, ग्रामपंचायत सदस्या पुनम रुके, अश्विनी नळकांडे, पोलिस पाटील रूपाली टेमगिरे, डॉ.रवींद्र टेमगिरे, धनंजय रुके, अविनाश रुके, बाळू टेमगिरे आदींचे हस्ते करण्यात आले.