पुणे : वृद्धांची सेवा-सुश्रृषा व घरकाम करण्यासाठी नोकर पुरविण्याचा बहाणा करुन शहराच्या वेगवेगळ्या भागातील 35 नागरीकांची फसवणूक करण्यात आल्याचा धक्कादायक प्रकार उघडकीस आला आहे. याप्रकरणी सायबर गुन्हे शाखेच्या पोलिसांनी एकास अटक केली. 

विक्रम अत्तार सिंग (वय 32 , रा. काळेपडळ, हडपसर) असे अटक केलेल्या संशयीत आरोपीचे नाव आहे.याप्रकरणी हवाई दलामध्ये काम करणाऱ्या एका अधिकाऱ्याने फिर्याद दिली होती. फिर्यादी यांच्या वृद्ध आई-वडीलांची सेवा-सुश्रृषा करण्यासाठी त्यांना नोकराची गरज होती. त्यासाठी त्यांनी एका वेबसाईटवर पाहणी केली. त्यानुसार त्यांना रुद्रसाई एंटरप्रायजेस या कंपनीची वेबसाईट निदर्शनास आली. त्यांनी त्यावर दिलेल्या मोबाईल क्रमांकावर संपर्क साधला. त्यावेळी सिंगने फिर्यादी यांना सुश्रृषा सेविकेचे मानधन व कमिशनपोटीची 26 हजार रुपयांची रक्कम आरएस एंटरप्रायजेस नावाच्या बॅंक खात्यावर जमा करण्यास सांगितले. त्यानुसार फिर्यादी यांनी रक्कम भरली. मात्र सेविका घरी न आल्याने अधिकाऱ्याने संबंधीत मोबाईल क्रमांकावर संपर्क साधला. त्यावेळी मोबाईल बंद असल्याचे निदर्शनास आले. आपली फसवणूक झाल्याचे लक्षात आल्यानंतर त्यांनी याबाबत सायबर गुन्हे शाखेकडे फिर्याद दिली. सायबर गुन्हे शाखेचे पोलिस उपायुक्त संभाजी कदम, सहाय्यक पोलिस आयुक्त निलेश मोरे यांच्या मार्गदर्शनाखाली पोलिस निरीक्षक राधिका फडके, जयराम पायगुडे, पोलिस उपनिरीक्षक सागर पडवळ, राहूल हंडाळ, शिरीष गावडे, संतोष जाधव व शितल वानखेडे यांनी तपासाला सुरवात केली. 

तांत्रिक तपास केल्यानंतर संबंधीत फसवणूकीचा प्रकार सिंग या व्यक्तीने केल्याचे निष्पन्न झाले. त्यानुसार पोलिसांनी त्यास सापळा रचून पकडले. त्याच्याकडे चौकशी केली, त्यावेळी त्याने आतापर्यंत तब्बल 35 जणांची याच पद्धतीने फसवणूक केल्याचे कबूल केले. दरम्यान त्याच्याकडून चार मोबाईल, एक डेबीट कार्ड असा ऐवज जप्त करण्यात आला.