पुणे - कमी किमतीचे हिऱ्याचे दागिने जास्त दराने विक्री करून एका महिलेची सुमारे साडेतीन कोटी रुपयांची फसवणूक केल्याचा प्रकार उघडकीस आला आहे. ही घटना लक्ष्मी रस्त्यावरील एका हिऱ्यांच्या दागिन्यांच्या शोरुममध्ये घडली.

या संदर्भात लोणी काळभोर येथील एका महिलेने विश्रामबाग पोलिस ठाण्यात फिर्याद दिली आहे. त्यानुसार सेल्समन चेतन विसपुते, संगीता महाजन, तेजल पवार, अमोल मोहिते, सागर धोंडे, चंदन गुप्ता, धवल मेहता, हितेश पुनमिया अशा आठ जणांविरुद्ध गुन्हा दाखल केला आहे. पोलिसांनी विसपुते याला अटक केली असून, न्यायालयाने त्याला १० जुलैपर्यंत पोलिस कोठडी सुनावली आहे.

पोलिसांनी दिलेल्या माहितीनुसार, फिर्यादीने लक्ष्मी रस्त्यावरील तनिष्क शोरुममधून वेळोवेळी ४ कोटी १९ लाख रुपयांचे हिऱ्यांचे दागिने खरेदी केले होते. जानेवारी २०२३ मध्ये त्यांनी हे हिऱ्यांचे दागिने बदलून दुसरे दागिने घेण्यासाठी शोरुममध्ये गेल्या होत्या.

त्यावेळी त्यांना काही कारणे सांगून दागिने न बदलण्याचा आग्रह धरला. त्यांनी बऱ्याचदा फोन करूनही त्यांना प्रतिसाद दिला नाही. तेव्हा त्यांनी याच कंपनीच्या दुसऱ्या शोरुममध्ये ते हिऱ्याचे दागिने दाखविले. तेव्हा त्यांच्याकडील हिऱ्याचे दागिने हलक्या दर्जाचे असल्याचे सांगण्यात आले. त्यांना कमी किमतीचे हिऱ्याचे दागिने जास्त किमतीत दिले.

जादा रकमेचे बनावट बिल तयार करुन त्यावर कंपनीचा शिक्का मारुन डिस्काऊंट दिल्याचे भासविले. अशा प्रकारे तीन कोटी ४८ लाख ८६ हजार रुपयांची फसवणूक केली. कंपनीने शोरूमध्ये नेमलेल्या व्यवस्थापक आणि काही कर्मचाऱ्यांनी ही फसवणूक केल्याची माहिती तपासात समोर आली आहे, अशी माहिती आर्थिक गुन्हे शाखेचे पोलिस निरीक्षक कृष्णा इंदलकर यांनी दिली.