रविवारी मोफत मोतीबिंदू
तपासणी, शस्त्रक्रिया शिबिर
राजस्थानी ब्राह्मण समाज संस्थेतर्फे आयोजन
सकाळ वृत्तसेवा
सोलापूर, ता. २७ : श्री राजस्थानी ब्राह्मण समाज संस्था आणि भारत विकास संगम यांच्या संयुक्त विद्यमाने ३० ऑगस्ट रोजी मोफत मोतीबिंदू तपासणी व शस्त्रक्रिया शिबिर आयोजित करण्यात आले आहे. चाटी गल्लीतील गायत्री भवन येथे सकाळी ९ ते दुपारी २ या वेळेत शिबिर होणार असल्याची माहिती संस्थेचे अध्यक्ष अशोक उपाध्ये यांनी पत्रकार परिषदेत दिली.
पुण्यातील साधू वासवानी मिशन संचलित बुधराणी हॉस्पिटलच्या सहकार्याने हे शिबिर होणार आहे. आर्थिकदृष्ट्या दुर्बल घटकातील नागरिकांची नेत्रतपासणी करून मोतीबिंदू आढळल्यास बुधराणी हॉस्पिटलमध्ये मोफत शस्त्रक्रिया करण्यात येणार आहे. रुग्णांना सोलापूरहून पुण्याला ने-आण करण्याची सुविधाही आयोजकांकडून उपलब्ध करून दिली जाणार आहे.
शस्त्रक्रियेनंतर रुग्णांना डॉक्टरांच्या देखरेखीखाली ठेवून आवश्यक आरोग्यसेवा दिली जाणार आहे. शिबिरासाठी नावनोंदणी बंधनकारक असून, येताना आधारकार्ड व मोबाईल क्रमांक सोबत आणावा, असे आयोजकांनी सांगितले. नागरिकांनी या शिबिराचा लाभ घ्यावा, असे आवाहन करण्यात आले.
पत्रकार परिषदेस घनश्याम दायमा, बालाप्रसाद ओझा, जुगलकिशोर तिवाडी, श्याम बुरबुरे, पुरुषोत्तम जोशी, अशोक गौड आदी उपस्थित होते.