पुणे, ता. ८ ः पीएमपी प्रशासन पुणे महापालिकेच्या शाळेतील इयत्ता ५ वी ते १२वीच्या विद्यार्थ्यांना शंभर टक्के अनुदानित मोफत तर पुणे महापालिका हद्दीतील खासगी शाळेतील इयत्ता ५ वी ते इयत्ता १०वीच्या विद्यार्थ्यांना ७५% अनुदानित मोफत बस प्रवास पास देणार आहे. यामुळे विद्यार्थ्यांना मोठा दिलासा मिळणार आहे.
विद्यार्थ्यांना मोफत पाससाठी १२ जूनपासून अर्जाचे वाटप सर्व आगारांमधून आणि पास केंद्रावर करण्यात येणार आहे. तसेच भरून दिलेले अर्ज महामंडळाच्या सर्व आगारांमध्ये स्वीकारण्यात येतील. संबंधित शाळा अथवा त्यांचे प्रतिनिधी हे त्यांच्या शाळेतील विद्यार्थ्यांसाठीचे अर्ज महामंडळाच्या कोणत्याही आगारांमधून एकत्रितरीत्या घेऊन जाऊ शकतात. तसेच हे अर्ज भरून एकत्रितरीत्या आगारामध्ये जमा केल्यास त्या शैक्षणिक संस्थेला एकत्रित पास दिले जातील. महामंडळाने दिलेले ते सर्व पास शाळा प्रमुखांनी त्यांच्या शाळेत वितरित करावेत. यामुळे सर्व विद्यार्थ्यांना आगारामध्ये येण्याची गरज भासणार नाही.