बारामती : मराठा आरक्षणाबाबत मुंबईत प्रजासत्ताक दिनापासून सुरु होणा-या उपोषणासाठी बारामती शहर व तालुक्यातून मोठ्या प्रमाणात मराठा बांधव सहभागी होणार आहेत. बारामतीत शुक्रवारी (ता. 16) झालेल्या पत्रकार परिषदेत या बाबत माहिती देण्यात आली.

मुंबईत 26 जानेवारी रोजी आझाद मैदानात मनोज जरांगे पाटील मराठा समाजाच्या आरक्षणाच्या मागणीसाठी आमरण उपोषण करणार आहेत. त्यांना साथ देण्यासाठी बारामती तालुक्यातील प्रत्येक गाव व वाडीवस्तीवरुन दहा ते बारा चार चाकी वाहने व सामानासाठी एक ट्रॅक्टर किंवा टेम्पो अशी प्रत्येक गावाने तयारी केल्याचे नमूद करण्यात आले.

बारामती तालुक्यातून एकूण दीड हजारांवर चार चाकी वाहने व सामानाचे टेम्पो 24 जानेवारी रोजी सकाळी सात वाजता छत्रपती शिवाजी महाराज उद्यानापासून श्री छत्रपती शिवाजी महाराजांच्या पुतळ्यास अभिवादन करून श्री क्षेत्र मोरगावच्या दिशेने निघतील. मोरगाव मध्ये आसपासचे बांधव एकत्र होऊन सर्व जण देहूरोडकडे निघणार आहेत.

आंदोलनासाठी येणाऱ्या बारामती तालुक्यातील सर्व समाज बांधवांच्या जेवणाची सर्व व्यवस्था ही मराठा क्रांती मोर्चा, बारामती यांच्या वतीने करण्यात येणार आहे. आंदोलनासाठी जाणाऱ्या समाज बांधवांसाठी वैद्यकीय प्रथमोपचार साहित्य सोबत घेण्यात येणार आहे. आंदोलन हे मनोज जरांगे पाटील यांचे सूचनेप्रमाणे होणार असून ते शांततेच्या मार्गानेच होणार आहे.

बारामती तालुक्यातील जे समाज बांधव आंदोलनासाठी येणार आहेत ते सर्वजण जरांगे पाटलांच्या आदेशाशिवाय आंदोलन ठिकाणापासून परत येणार नाहीत. आंदोलनाला निघाल्यापासून परत येईपर्यंत कोणीही कोणत्याही अफवांना बळी पडू नये. जो पर्यंत मनोज जरांगे पाटील स्वतः एखादी गोष्ट स्वतःच्या तोंडाने सांगत नाहीत. तोपर्यंत कोणीही कुठल्याही निष्कर्षाला येवू नये, असे आवाहन मराठा क्रांती मोर्चा, बारामती यांच्या वतीने करण्यात आले आहे.