राजगुरूनगर (पुणे) : तीन वर्षांपूर्वी गावठी दारूच्या भट्टीवर छापा टाकायला गेलेल्या पोलिसांवर हल्ला झालेल्या गुन्ह्यातील फरारी तीन आरोपींना स्थानिक गुन्हे शाखेच्या पथकाने गुरुवारी (ता. 16) पहाटे जेरबंद केले. 

महाराष्ट्राला यावर्षीही महापुराचा धोका; श्रावणसरी बसरणारच नाहीत

पोलिसांनी दिलेल्या माहितीनुसार, सुमारे तीन वर्षांपूर्वी शिरगावच्या (ता. खेड)  हद्दीतील विठ्ठलवाडी येथील गावठी दारूच्या भट्टीवर छापा टाकण्यासाठी खेड पोलिस ठाण्यातील पथक गेले होते. याच ठिकाणी महाराष्ट्राचा राज्य प्राणी शेकरू तस्करीसाठी आणला आहे, अशीही माहिती पोलिसांना होती. त्यावेळी छापा टाकायला गेलेल्या पोलिसांवर जमावाने जीवघेणा हल्ला केला होता. त्या हल्ल्यात सात पोलिस अधिकारी व कर्मचारी जखमी झाले होते. 

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

या प्रकरणात अनेकांवर गुन्हा दाखल करण्यात आला होता. त्यातील संशयित आरोपी, रघुनाथ दामू वाघ (वय ४५), संतोष रघुनाथ वाघ (वय २१) आणि सखाराम दामू वाघ (वय ४७) हे तिघे जण तेव्हापासून फरारी होते. सध्या ते गावी आल्याचे पुणे ग्रामीण स्थानिक गुन्हे शाखेच्या पथकाला समजले. त्यावरून आज पहाटेच स्थानिक गुन्हे शाखेचे पोलिस निरीक्षक पद्माकर घनवट यांच्या मार्गदर्शनाखाली पोलिस निरीक्षक रवींद्र मांजरे, पोलिस हवालदार शंकर जम, सुनील जावळे, शरद बांबळे, दीपक साबळे, अक्षय जावळे यांच्या पथकाने शिरगावच्या विठ्ठलवाडी वस्तीवर छापा मारला. पूर्वीचा अनुभव लक्षात घेता, स्थानिकांचा विरोध होणार हे गृहीत धरून गुन्हे शाखेच्या पथकाने युक्ती आणि कौशल्य वापरले आणि संशयित आरोपींच्या राहत्या घरातून तिनही आरोपींना ताब्यात घेऊन खेड पोलिसांच्या स्वाधीन केले.

Edited by : Shivnandan Baviskar