वाघोली - छत्रपती संभाजी महाराज (Chhatrapati Sambhaji Maharaj) यांच्या तुळापुरातील स्मारकासही (Memorial) निधी (Fund) देण्याचे आश्‍वासन पर्यावरण-पर्यटनमंत्री आदित्य ठाकरे (Aditya Thackeray) यांनी दिले असल्याची माहिती जिल्हा परिषद सदस्य ज्ञानेश्वर कटके यांनी दिली.

तुळापूर आणि वढु बुद्रुक येथील छत्रपती संभाजी महाराजांचे स्मारक साकारण्याबाबत उपमुख्यमंत्री अजित पवार, पर्यटनमंत्री ठाकरे यांच्या प्रमुख उपस्थितीत मंत्रालयात नुकतीच विशेष बैठक घेण्यात आली. यामध्ये वढु बुद्रुक येथील स्मारकाच्या आराखड्यावर चर्चा होऊन 50 कोटींचा निधी मंजूर करण्यात आला आहे. या निर्णयाचे स्वागत आहे. या अनुषंगाने तुळापुरातील स्थानिक ग्रामस्थांसह शंभुभक्‍तांच्या भावनांचा विचार करून तुळापूर येथील प्रस्तावीत स्मारकाच्या आराखड्यासही निधी मंजूर करण्यात यावा, अशी मागणी पर्यटनमंत्री ठाकरे यांच्याकडे निवेदनाद्वारे ज्ञानेश्‍वर कटके व माऊली शिवले यांनी केली.

ठाकरे हे पुणे भेटीवर आले असता कटके यांनी त्यांची भेट घेतली. तुळापुर ग्रामपंचायतीकडूनही यासंदर्भात निवेदन देण्यात आले आहे. सरपंच गुंफा इंगळे, उपसरपंच नवनाथ शिवले, सदस्य दत्तात्रय खैरे, शिवाजी शिवले, अर्चना पुजारी, सुवर्णा राऊत, सुनिता शिवले, सुरेखा शिवले, सुनिता नवनाथ शिवले यांनीही तुळापुरातील स्मारकाबाबत निधीची मागणी केली आहे. याबाबत तातडीने हालचाली करण्यात येतील, निधी मंजुरीबाबत प्रयत्न सुरू असल्याचे ठाकरे यांनी कटके यांच्यासह उपस्थितांना सांगितले.

तुळापूर येथे छत्रपती संभाजी महाराजांच्या समाधीचे दर्शन घेण्यासाठी, त्यावर नतमस्तक होण्यासाठी दरवर्षी लाखो नागरिक येतात. विकास आराखडा तयार आहे. निधी उपलब्ध झाल्यावर त्वरित काम सुरू होईल. महाराजांच्या समाधीचे पावित्र्य जपून स्मारकाचे तसेच परिसराच्या विकासाचे काम तातडीने व्हावे ही सर्वांची इच्छा आहे.

- ज्ञानेश्‍वर कटके, शिवसेना जिल्हा प्रमुख तथा जिल्हा परिषद सदस्य.