पुणे - पुण्यात जानेवारी २०२३ मध्ये होणाऱ्या जी-२० राष्ट्रांच्या परिषदेच्या आयोजनप्रसंगी देशाची प्रतिमा उंचावण्यास सर्वोच्च प्राधान्य देण्यात यावे. तसेच, परिषदेसाठी येणाऱ्या शिष्टमंडळाच्या भेटीप्रसंगी सुरक्षिततेला आणि शहराचे सौदर्यीकरण आणि स्वच्छतेकडे विशेष लक्ष द्यावे, असे निर्देश येथे आयोजित जी-२० परिषदेचे भारत सरकारचे विशेष कार्य अधिकारी लेफ्टनंट कर्नल उदयसिंग बारंगुले यांनी दिले.

जी-२० राष्ट्रसमुहाच्या परिषदेचे आयोजन भारतात होत असून, महाराष्ट्रात मुंबईसह पुणे आणि औरंगाबाद येथे या परिषदेतील सत्रांचे आयोजन करण्यात आले आहे. पुणे येथे होणाऱ्या जी-२० राष्ट्रांच्या परिषदेबाबत बारंगुले यांनी विधान भवन येथे बैठकीत पूर्वतयारीचा आढावा घेतला. विभागीय आयुक्त सौरभ राव, जिल्हाधिकारी डॉ. राजेश देशमुख यांच्यासह विविध विभागांचे अधिकारी या वेळी उपस्थित होते.

परिषदेच्या नियोजनामध्ये कोणत्याही त्रुटी राहू नयेत. पुणे येथे जी-२० परिषदेच्या चार बैठकांचे आयोजन करण्यात आले असून, येत्या १६ ते १७ जानेवारी दरम्यान इन्फ्रास्ट्रक्चर वर्किंग ग्रुप बैठकीचे आयोजन करण्यात आले आहे. यासाठी सर्व संबंधित विभागांनी समन्वय ठेवून कार्य करावे. महाराष्ट्रासह पुण्याचा समृद्ध सांस्कृतिक वारसा, ऐतिहासिक स्थळे, येथील खाद्यसंस्कृती, स्वच्छ पुणे याबाबतचे वैविध्य जगासमोर आणण्याची संधी मिळाली आहे. त्यादृष्टीने नियोजन करण्यात यावे, अशी सूचना बारंगुले यांनी केली. विविध देशांतून येणाऱ्या प्रतिनिधींच्या १२ ते १४ जूनदरम्यान डिजिटल इकॉनॉमी वर्किंग ग्रुपची बैठक होणार आहे. २६ व २७ जून रोजी एज्युकेशन वर्किंग ग्रुपची बैठक आणि २८ जून रोजी एज्युकेशन वर्किंग ग्रुप मिनिस्टेरियल बैठकीचे आयोजन करण्यात आल्याची माहिती त्यांनी दिली.

विभागीय आयुक्त राव म्हणाले, आंतरराष्ट्रीय कार्यक्रमांचे आयोजन करण्याचा प्रशासनाला अनुभव आहे. जी-२० परिषदेदरम्यान आयोजित सत्रांच्या आयोजनासाठी आवश्यक तयारी सुरु आहे. परदेशातून येणाऱ्या पाहुण्यांना विमानतळ ते मुक्कामाच्या ठिकाणापर्यंत पुण्याची वैशिष्ट्ये ठळक दिसतील, अशा पद्धतीने नियोजन करण्यात आले आहे. ऐतिहासिक व महत्त्वाची वारसा ठिकाणे, शैक्षणिक ठिकाणे, उद्योग आदी ठिकाणी परिषदेतील प्रतिनिधींच्या भेटींचे नियोजन करण्यात येत आहे. बैठकीस महसूल, पर्यटन, आरोग्य, सांस्कृतिक कार्य विभाग, पोलिस आणि परिवहनसह विविध विभागांचे अधिकारी उपस्थित होते.