पुणे - आंध्र प्रदेशातून पुण्यात विक्रीसाठी आणलेला एक कोटी चार लाख रूपयांचा ५२० किलो गांजा आणि १५ लाख ७१ हजार रुपयांचा इतर ऐवज गुन्हे शाखेच्या अमली पदार्थ विरोधी पथकाने जप्त केला. आरोपींकडून दोन मोटारींवर महाराष्ट्र शासनाची पाटी लावून अमली पदार्थ विक्री केली जात असल्याचे तपासात समोर आले आहे.

या प्रकरणी पोलिसांनी एका महिलेसह तीन आरोपींना अटक केली आहे. संदीप बालाजी सोनटक्के (वय २९, रा. दहिवली, पाली फाटा, खोपोली ता. खालापुर, जिल्हा रायगड), निर्मलाकोटेश्वरी मुर्ती जुन्नुरी (वय ३६, रा. चिलाकरलुपेठ, जिल्हा गुंटुर, आंध्रप्रदेश) आणि महेश तुळशीराम परीट (वय २९, रा. तुपगाव, ता. खालापुर, जिल्हा रायगड) अशी अटक केलेल्या आरोपींची नावे आहेत.

पोलिस आयुक्त रितेश कुमार यांनी शहरात अमली पदार्थ तस्करी रोखण्यासाठी विशेष मोहीम राबविण्याचे आदेश दिले आहेत. त्या अनुषंगाने कारवाई सुरू असताना पुणे- नगर रस्त्यावरील लोणीकंद परिसरात दोन वाहनांवर महाराष्ट्र शासनाची पाटी लावून आंध्रप्रदेश येथून मोठ्या प्रमाणात गांजा विक्रीसाठी पुण्यात येत असल्याची माहिती पोलिस अंमलदार योगेश मांढरे यांना शनिवारी (ता‌.२) मिळाली.

याबाबत गुन्हे शाखेचे अतिरिक्त पोलिस आयुक्त रामनाथ पोकळे, पोलिस उपायुक्त अमोल झेंडे आणि सहायक पोलिस आयुक्त सतीश गोवेकर यांच्या सूचनेनुसार पोलिस निरीक्षक सुनील थोपटे, पोलिस उपनिरीक्षक शुभांगी नरके यांच्या अमली पदार्थ विरोधी पथक-२ ने लोणीकंद परिसरात छापा टाकून आरोपींना ताब्यात घेतले. आरोपींकडून दोन मोटारींसह ५२० किलो ५५० ग्रॅम गांजा, चार मोबाईल संच जप्त करण्यात आले आहेत. या प्रकरणी लोणीकंद पोलिसांनी गुन्हा दाखल केला आहे.

अमली पदार्थ विरोधी पथकातील पोलिस कर्मचारी शिवाजी घुले, संतोष देशपांडे, युवराज कांबळे, प्रशांत बोमादंडी, संदीप जाधव, मयुर सुर्यवंशी, मनोज साळुंके, विशाल दळवी, विशाल शिंदे, सचिन माळवे, दिनेश बास्टेवाड, सिंहगड पोलिस ठाण्यातील अविनाश कोंडे, ऋषिकेश महाले, सलिम तांबोळी, किरण बरडे यांनी ही कारवाई केली.