सांगवी : चालू हंगामात ऊसाला एफ आर पी अधिक 200 रुपये असा दर मिळावा, या मागणीसाठी रविवारी सकाळी 11 वाजता स्वाभिमानी शेतकरी संघटनेकडून फलटण येथे पुणे- पंढरपूर व बारामती-सांगली मार्गावर क्रां. नाना पाटील चौकात चक्का जाम आंदोलन करण्यात आले. यावेळी ऊसाला दर मिळण्यासाठी कोल्हापूर/सांगली येथील कारखानदार यांनी एकरकमी एफ आर पी देण्याचे मान्य केले. मात्र, सातारा जिल्ह्यातील कारखानदार यांनी भूमिका जाहीर केली नाही. साताऱ्यात होणाऱ्या बैठकीत ठोस निर्णय न झाल्यास उद्यापासून तीव्र आंदोलन छेडले जाईल, असा इशारा जिल्हाध्यक्ष धनंजय महामुलकर यांनी दिला आहे.

या चक्का जाम आंदोलन करतेवेळी काही काळ तणावाचे वातावरण निर्माण झाले होते. मात्र वेळीच पोलिसांनी स्वाभिमानी शेतकरी संघटना व पोलिस यांनी चर्चा केली व शांतपणे हे आंदोलन केले जाईल. कोणत्याही प्रकारे कायदा हातात घेणार नाही किंवा सर्वसामान्य लोकांना याचा त्रास होणार नाही असे स्वाभिमानी शेतकरी संघटना यांनी जाहीर केले व चक्का जाम करण्यात आला या वेळी संपूर्ण रस्ते ओस पडले होते.

यानंतर महामुलकर, डॉ. रविंद्र घाडगे, नितीन यादव, प्रमोद गाडे, सचिन खानविलकर, अनिल नाळे यांचेसह सर्व आंदोलनकर्त्यांना ताब्यात घेऊन त्यांचेवर कारवाई केली. यावेळी चक्का जाम झाल्याने वाहनांच्या तीन किलोमीटरवर रांगा लागल्या होत्या. मात्र कोणताही अनुचित प्रकार न घडता शांतपणे आंदोलन झाले. यावेळी आर्थिक गुन्हे शाखेचे उपअधीक्षक राजेंद्र साळुंखे, पोलिस निरीक्षक प्रकाश सावंत व अधिकारी कर्मचारी यांनी चोख बंदोबस्त ठेवला होता.