कोंढवा, ता. ९ : कात्रज-कोंढवा रस्त्यावरील ग्रेडसेपरेटरसाठी (समतल विलघक) खोदलेल्या खड्ड्यात पडून एका मुलीचा मृत्यू शनिवारी (ता. ९) झाला. या प्रकरणी खडीमशिन चौक ते कात्रजकडे जाणाऱ्या रस्त्याच्या ठेकेदारावर कलम ३०४ अ अन्वये सदोष मनुष्यवधाचा गुन्हा दाखल करण्यात आला आहे. या प्रकरणी जगदीश छगन शिलावट (वय ३५) यांनी कोंढवा पोलिसांत फिर्याद दिली आहे.

कात्रज-कोंढवा रस्त्यावरील महाकाली मंदिराजवळील ग्रेडसेपरेटरसाठी खोदलेल्या खड्याला कोणत्याही प्रकारच्या सुरक्षाविषयक बाबीचे पालन न करण्यात आल्यानेच ही घटना घडली असल्याचे कारण देत पोलिसांकडून गुन्हा दाखल करण्यात आला आहे. सदर खड्डा रस्ता बनविणाऱ्या ठेकेदाराने खोदला असून सदर खड्यास कोणताही संरक्षक कठडा अथवा इतर कोणतीही संरक्षक उपाययोजना केली नाही. ठेकेदाराच्या निष्काळजीपणामुळेच सदर खोदलेल्या खड्यात पावसाच्या साचलेल्या पाण्यात बडून मुस्कान शिलावट (वय १६) या मुलीचा मृत्यू झाला आहे. त्यानुसार मुलीच्या नातेवाईंकाच्या फिर्यादीनुसार त्या पद्धतीने गुन्हा नोंद केला असल्याची माहिती कोंढवा पोलिसांनी दिली. याबाबतचा पुढील अधिक तपास पोलिस निरिक्षक मानसिंग पाटील करत आहेत.