पुणे शहरातून एक धक्कादायक घटना समोर आली आहे. पुण्यातील भाटघर धरण परिसरात तरुणासोबत फिरायला गेलेल्या तरुणीवर काळाने घाला घातला आहे. नीरा नदीच्या किनाऱ्यावर बसलेल्या तरुणीचा अचानक तोल जाऊन ती पाण्यात पडली आणि प्रवाहासोबत वाहून गेली.

दरम्यान या मुलीसोबत असलेल्या तरुणाने तिला वाचविण्याचा प्रयत्न केला, पण तो तिला वाचवू शकला नाही. यानंतर संबंधीत तरुणाने भोर पोलिस ठाण्यात जाऊन पोलिसांना याबद्दलची माहिती दिली. साम टीव्हीने याबद्दलचे वृत्त दिले आहे.

घटनेची माहिती मिळताच पोलिस घटनास्थळी दाखल झाले. यानंतर पोलिस, आपत्ती व्यवस्थापन कक्ष आणि सह्याद्री रेस्क्यू फोर्सचे जवान तरुणीच्या मृतदेहाचा शोध घेत आहेत. सोमवारी (ता.३) सायंकाळी पाचच्या सुमारास ही घडली.

सायंकाळी निगुडघर (ता.भोर) येथील तरुण आणि संबंधीत तरुणी हे दोघे भाटघर धरणाजवळ फिरण्यासाठी आले होते. धरणाच्या भिंतीच्या खालच्या बाजूला पॉवर हाऊसच्या जवळ नदीच्या कडेला पाण्यात पाय सोडून दोघेही बसले होते, अशी माहिती भोर पोलिसांनी माहिती दिली आहे.