पुणे- शहरातील सारसबाग येथील श्री महालक्ष्मी देवीला विजया दशमीच्या निमित्ताने सोन्याची साडी अर्पण करण्यात आली आहे. तब्बल १६ किलो सोन्याची साडी परिधान केलेल्या देवीचे सुवर्णवस्त्रातील रुप विलोभनीय आणि लक्ष वेधून घेणारे आहे.

दस-याच्या निमित्ताने दरवर्षी सारसबागेसमोर असलेल्या श्री महालक्ष्मी देवीचा उत्सव मोठ्या भक्तिभावाने साजरा केला जातो. यावेळी सर्वच सणांवर कोरोनाचे सावट असल्याने प्रशासनाकडून विशेष नियमावली जाहिर करण्यात आली आहे. आरोग्याच्या सुरक्षेसाठी भक्तांना मंदिरात जाण्याची परवानगी नाकारण्यात आली आहे. पालिका, पोलीस प्रशासन याला कार्यकर्ते यांच्याकडून सहकार्य मिळत आहे.

दरवर्षीच्या प्रथेप्रमाणे देवीला सोन्याची साडी परिधान केली जाते. कोरोनामुळे मंदिर बंद असले तरी देखील सोन्याची साडी परिधान केलेल्या देवीचे सुवर्णवस्त्रातील मनोहारी रुपाचे दर्शन भाविकांनी ऑनलाईन पद्धतीने घेतले. वर्षभरात केवळ दोन वेळा म्हणजेच दसरा आणि लक्ष्मीपूजनाच्या दिवशी ही साडी देवीला नेसविण्यात येते, त्यामुळे या दिवसाला महत्व आहे.