पुणे - ‘गोष्ट पैशापाण्याची’ हे प्रफुल्ल वानखेडे लिखित आणि सकाळ प्रकाशित पुस्तक सर्व पुस्तकांमध्ये, सर्व भाषांमध्‍ये, सर्व श्रेणीमध्ये पुन्‍हा एकदा भारतामध्‍ये #1 बेस्टसेलर ठरले आहे. या असामान्य पुस्तकाचा प्रवास २०२२ च्या सप्टेंबर महिन्यात सुरू झाला.

१० दिवसांत, उत्सुक वाचकांनी १८,००० प्रती बुक केल्या, ज्यामुळे भव्य साहित्यिक विजयाचा पाया घातला गेला. ऊर्जा क्षेत्रातील यशस्वी उद्योजक आणि लेट्स रीड इंडिया ही वाचन चळवळ सुरू करणारे प्रफुल्ल वानखेडे यांचे सकाळच्या ‘अवतरण’ या पुरवणीतील गोष्ट पैशापाण्याची सदर लोकप्रिय ठरले. या लेखांचा संग्रह म्हणजेच ‘गोष्ट पैशापाण्याची’ हे पुस्तक.

९ ऑक्टोबर २०२२ रोजी ‘गोष्ट पैशापाण्याची’चे औपचारिक प्रकाशन झाले आणि अपेक्षेपेक्षाही त्याचे स्वागत दणदणीत झाले. ३०,००० प्रतींची पहिली आवृत्ती हातोहात विकली गेली. त्यामुळे एका महिन्याच्या आत ३०,००० अधिक प्रतींची दुसरी छपाई तातडीने करण्यात आली.

या साहित्यिक चमत्काराची उत्सुकता वाढतच गेली आणि २०२३ च्या फेब्रुवारीमध्ये, सकाळ प्रकाशनाने या पुस्तकाची ४०,००० प्रतींची तिसरी आवृत्ती प्रकाशित केली. आणि आता, चौथी आवृत्ती बाजारात आली आहे. अर्थातच यातून या पुस्तकाची लोकप्रियता दिसते.

अवघ्या सहा महिन्यात एक लाख प्रती विकण्याचा बहुमान मिळवलेले हे मराठीतील पहिले पुस्तक आहे. विशेष म्हणजे की, ‘गोष्ट पैशापाण्याची’ने अमेझॉनवर एक उल्लेखनीय कामगिरी केली आहे, जवळपास एक महिना भारतातील टॉप १० पुस्तकांमध्ये कायमस्वरूपी स्थान मिळवले आहे. तिसऱ्या रॅंकमध्ये पोहोचून, प्रसिद्ध इंग्रजी लेखक गोपाल गौरदास आणि अमिश त्रिपाठी यांच्या पुस्तकांनाही ‘गोष्ट पैशापाण्याची’ने मागे टाकले.

या पुस्तकाने वाचकांना इतकं प्रभावित केली की सोशल मीडियावरही हे पुस्तक प्रचंड व्हायरल झाले. एक लाखाहून अधिक वाचकांनी या पुस्तकाविषयी आपली मते व्यक्त केली. हजारो जणांनी ट्विटरवर त्यांचे विचार शेअर केले, साहित्यिक जगातली एक विशेष घटना म्हणून या पुस्तकाचा उल्लेख आता करायला हवा.

महाराष्ट्रासह कर्नाटक, मध्य प्रदेश, गुजरात, पश्चिम बंगाल, आसाम, राजस्थान ते जम्मू-काश्मीरमधूनही पुस्तकाला मागणी आली. आता भारताबाहेरच्या जगालाही ‘गोष्ट पैशापाण्याची’ या पुस्तकाने मोहिनी घातली आहे. १२० देशांमध्ये आंतरराष्ट्रीय स्तरावर हे पुस्तक आता उपलब्ध आहे. प्रकाशनाच्या दिवशीच फ्रान्समध्ये त्याच्या ४३ प्रती त्वरित विकल्या गेल्या.या यशाने केवळ लेखकाला आणि प्रकाशकांनाच नाही तर मराठी प्रकाशन उद्योगातही एकता आणली.

पुस्तकविक्रेत्यांनी या प्रचंड प्रतिसादाचा आनंद लुटला. अनेक प्रकाशकांनी पुस्तकाचे आणि त्याच्या विलक्षण स्वागताचे कौतुक केले. अनेकांनी या कामगिरीला उद्योगासाठी एक महत्त्वाचा आशादायी किरण म्हणून पाहिले आहे. पॉप्युलर प्रकाशनाचे रामदास भटकळ म्हणाले, ‘‘की माझ्या माहितीप्रमाणे असं यश कुठल्याही पुस्तकाला मिळालेले नाही.

पुस्तक लिहिताना, छापताना आणि ते लोकांपर्यंत पोहोचवताना ज्या कल्पना तुम्ही लढवलेल्या आहेत त्या संबंध व्यवसायाला वेगळी दिशा दाखवण्याइतक्या महत्त्वाच्या आहेत,असं मला वाटतं. आणि तसं होवो असं मी माझ्या समव्यावसायिकांच्या दृष्टीने प्रार्थना करतो.’’

असाही विक्रम

• ३० हजार प्रतींची एक आवृत्ती असणारे पहिले पुस्तक

• प्रकाशनापूर्वी १८ हजार पुस्तकांची मागणी नोंदवली

• ३० दिवसांत ६० हजार प्रती बाजारात उपलब्ध होणारे पहिले पुस्तक

खूप दिवसांनी मी पुस्तक वाचलं. मध्यंतरी माझा वाचनावरचा विश्वास उडाला होता. पण या पुस्तकाने आयुष्याकडे, स्वतःकडे बघायला शिकवलं, माझ्या चुका लक्षात आल्या, या चुका टाळू शकलो असं वाटलं. फार रेफरन्स वगैरे दिलेलं, आव आणलेलं, किचकट काहीतरी वाचण्यापेक्षा हे वेगळं वाटलं.

रिक्षाचा किस्सा वाचला आणि डोळ्यात पाणी आलं, असे २-३ किस्से माझ्याबाबतही घडले त्यामुळे हे पुस्तक वाचताना मी त्यात गुंगत गेलो. नंतरचा टीव्ही विकत घेतल्याचा किस्सा, तो डिसिजन, असे कित्येक प्रसंग माझ्या आयुष्यातल्या गोष्टींशीही रिलेट झाले. यातला प्रत्येक प्रसंग काहीतरी देऊन जातो, विचार करायला लावतो. त्यामुळे मला हे पुस्तक खूपच आवडलं.

- सयाजी शिंदे, अभिनेते