भोर - तालुक्यातील ग्रामपंचायतीच्या निवडणूकीत ८३.५४ टक्के मतदान झाले असून मतदान प्रक्रीयेत कोणताही अनुचित प्रकार घडला नाही. तालुक्यातील १४ ग्रामपंचायतीच्या सार्वत्रीक आणि पोटनिवडणूकीतील १० हजार २५८ मतदारांपैकी ८ हजार ५७० मतदारांनी मतदान केले. महिलांनी पुरुषांच्या बरोबरीने मतदान केले आहे. महिलांच्या मतदानाची टक्केवारी ८२ तर पुरुषांच्या मतदानाची टक्केवारी ८४ आहे. ४ हजार ९३० महिला मतदारांपैकी ४ हजार ४८ महिलांनी मतदान केले.

तर ५ हजार ३२८ पुरुष मतदारांपैकी ४ हजार ५२२ जणांनी मतदान केले. सर्वाधिक ९०.८२ टक्के मतदान हे जयतपाड ग्रामपंचायतीमध्ये झाले आहे. त्याखालोखाल दापकेघर ग्रामपंचायतीमध्ये ८९ टक्के आणि हिर्डोशी, महुडे खुर्द आणि माळेगाव ग्रामपंचायतीमध्ये ८८ टक्के मतदान झाले आहे. तर सर्वात कमी ७२ टक्के मतदान हे शिरवली हिमा ग्रामपंचायतीमध्ये झालेले आहे.

शिरवली हिमा ग्रामपंचायतीमध्ये ७६४ मतदारांपैकी ४५९ जणांनीच मतदानाचा हक्क बजावला. वडतुंबी गावात १ हजार २५० मतदार असूनही केवळ ९३१ मतदारांनी मतदान केले आहे. सायंकाळी सात वाजेपर्यंत सर्व मतदान यंत्रे शहरातील औद्योगीक प्रशिक्षण संस्थेत जमा करण्यात आले. औद्योगीक प्रशिक्षण संस्थेमध्ये सोमवारी (ता.६) सकाळी १० वाजता मतमोजणीस सुरुवात होणार आहे. मतमोजणीसाठी १० टेबल्स ठेवण्यात आले असून साडेबारापर्यंत सर्व निकाल हाती येणार असल्याचे तहसीलदार सचिन पाटील यांनी सांगितले.