दौंड (पुणे) : कर्तव्य बजावताना हुतात्मा झालेल्या देशातील पोलिस अधिकारी व जवानांना दौंड शहरात पोलिसांच्या वतीने मानवंदना देत अभिवादन करण्यात आले.

ताज्या बातम्यांसाठी डाऊनलोड करा ई-सकाळचे ऍप

दौंड शहरातील राज्य राखीव पोलिस दलाच्या (एसआरपीएफ) मैदानावर आज (ता. २१) हुतात्मा पोलिसांना अभिवादन करण्यात आले.

देशभरात १ सप्टेंबर २०१९ ते ३१ ऑगस्ट  २०२० या कालावधीत कर्तव्य बजावताना हुतात्मा झालेल्या पोलिस अधिकारी व कर्मचारी यांना अभिवादन करण्यात आले. धीरगंभीर वातावरणात राज्य राखीव पोलिस दलाच्या बॅण्‍ड पथकाने शोक धून वाजविली.

महाराष्ट्रातील बातम्या वाचण्यासाठी येथे ► क्लिक करा

एसआरपीएफ गट क्रमांक सातचे समादेशक श्रीकांत पाठक, गट पाचचे समादेशक तानाजी चिखले, नानवीज (ता. दौंड) येथील पोलिस प्रशिक्षण केंद्राचे प्राचार्य संदीप आटोळे, राज्य राखीव पोलिस प्रशिक्षण केंद्राचे प्राचार्य रोहिदास पवार यांच्यासह सहायक समादेशक सुभाष धुमाळ, चंद्रकांत शारबिद्रे, उप प्राचार्य कैलास न्यायनीत यांनी स्मृतीस्तंभास पुष्पचक्र अर्पण करून मानवंदना दिली. एसआरपीएफ, नानवीज (ता. दौंड) येथील पोलिस प्रशिक्षण केंद्र आणि राज्य राखीव पोलिस प्रशिक्षण केंद्रातील एकूण ३१ अधिकारी व २३३ पोलिस कर्मचारी यांच्यासह हुतात्मा पोलिसांचे कुटुंबीयांनी या वेळी अभिवादन केले.

दौंड पोलिस ठाण्यात हुतात्मा पोलिसांच्या नामावलीचे वाचन करून पोलिस निरीक्षक सुनील महाडिक यांच्यासह अधिकारी व पोलिस कर्मचार्यांनी श्रध्दांजली वाहिली. 

ताज्या बातम्यांसाठी डाऊनलोड करा ई-सकाळचे ऍप

पोलिस हुतात्मा दिन- २१ ऑक्टोबर १९५९ रोजी लडाखच्या पूर्वोत्तर भागातील हॉटस्प्रिंग येथे केंद्रीय राखीव पोलिस सुरक्षा दलाच्या तुकडीवर चिनी लष्कराच्या बटालियनने केलेल्या हल्ल्यात भारताचे दहा जवान हुतात्मा झाले होते. सर्वोच्च बलिदान देणार्या या पोलिसांचे कृतज्ञतापूर्वक स्मरण आणि या हुतात्मा झालेल्या पोलिसांमाणे राष्ट्रनिष्ठेची ज्योत पोलिसांसह सर्वसामान्य नागरिकांच्या मनात तेवत राहावी, याकरिता जानेवारी १९६० मध्ये झालेल्या देशाच्या सर्व पोलिस महानिरीक्षकांच्या परिषदेत दरवर्षी २१ ऑक्टोबर हा दिवस पोलिस हुतात्मा दिन म्हणून पाळण्याचा निर्णय घेण्यात आला होता. 

(संपादन : सागर डी. शेलार)