राजगुरूनगर (पुणे) : अवैध गुटखा विक्री करणाऱ्या दोन ठिकाणी छापा टाकून सुमारे 1 लाख 80 हजार रुपयांचा अवैध गुटखा जप्त करण्याची कारवाई राजगुरुनगरमध्ये खेड उपविभागीय पोलिस अधिकारी कार्यालयाच्या पथकाने केली. त्यानंतर पुढील कारवाईसाठी अन्न व औषध प्रशासनाच्या अधिकाऱ्यांना पाचारण केल्यावर त्यांनी यासंदर्भात खेड पोलिस ठाण्यात फिर्याद दाखल केली.

पोलिस प्रशासनाने दिलेल्या माहितीनुसार, येथील पाबळ रस्त्यावरील ए-वन एजन्सी या दुकानात अवैध गुटखा विक्री सुरु असल्याची खबर खेड उपविभागीय पोलिस अधिकारी कार्यालयाला रविवारी संध्याकाळी मिळाली. त्यानंतर उपविभागीय पोलिस अधिकारी गजानन टोम्पे यांच्या मार्गदर्शनाखाली, फौजदार आदिनाथ महानवर यांच्या नेतृत्वाखाली ए व्ही कालेकर, भाऊसाहेब ठोसर, राजेंद्र देवकाते, रुबीना शेख, मंगल वडेकर या पथकाने त्याठिकाणी छापा मारला आणि गुटखा जप्त केला. नंतर पुढील कारवाईसाठी अन्न व औषध प्रशासनाच्या पथकास पाचारण केले. त्यांनी छापा मारु जप्त केलेल्या मालाचा पंचनामा केला आणि त्यानंतर अन्न सुरक्षा अधिकारी वंदना रुपनवर यांनी याप्रकरणी खेड पोलिस ठाण्यात फिर्याद दिली. त्यांच्या फिर्यादीनुसार, आरएमडी आणि विमल पानमसाला व त्यासोबत सेंटेड तंबाखू अशी पॅकेट्स मिळून 1 लाख 77 हजार 880 रुपयांचा प्रतिबंधित आणि आरोग्यास हानिकारक असा जप्त केलेला माल आहे. हा माल बाळगणाऱ्या तेजाराम वनाजी सोळंकी (वय ३८, रा. संकल्प डेव्हलपर्स बिल्डिंग, चव्हाण मळा, राजगुरूनगर) यास अटक करण्यात आली आहे.

सोमवारी सकाळी खेड पोलिस ठाण्याचे सहायक पोलिस निरीक्षक निलेश बडाख, पोलिस उपनिरीक्षक श्रीराम पडवळ, संतोष मांडवे यांचे पथक गस्त घालत असताना त्यांनी वाडा रस्त्यावरील मोमीन ट्रेडर्स या दुकानातून २८२० रुपयांचा गुटखा जप्त केला. त्याचाही पंचनामा करून वंदना रुपनवर यांनी, गुटखा बाळगणाऱ्या तन्वीर युसुफ मोमीन (वय ४०, रा. मोमीन आळी, राजगुरूनगर) याच्याविरुद्ध दिलेल्या फिर्यादीवरून खेड पोलिसांनी गुन्हा दाखल करून त्याला अटक केली. तसेच दोघांचीही दुकाने 'सील' करण्यात आली आहेत. पुढील तपास सहायक पोलिस निरीक्षक संदीप येळे करीत आहेत.