नसरापूर (पुणे) : राज्यभरातील नाभिक समाज उद्या (ता. 9) सकाळी अकरा वाजता रस्त्यावर उतरून राज्यातील जिल्हाधिकारी व तहसील कार्यालयासमोर शांततेत आंदोलन करणार असून, आम्हाला दुकाने सुरु करूद्या नाहीतर आर्थिक मदत करा, अशी मागणी करणार असल्याची माहिती नाभिक महामंडळाचे पश्चिम महाराष्ट्राचे कार्यकारणी सदस्य विश्वास ननावरे यांनी दिली आहे.

अमोल कोल्हे म्हणतात, कोरोनाबरोबर राहण्याची तयारी ठेवली पाहिजे

महाराष्ट्र नाभिक महामंडळाचे पश्चिम महाराष्ट्र अध्यक्ष शंकर मर्दाने यांनी नाभिक समाजासाठी एक निवेदन प्रसिद्ध केले आहे. याबाबत विश्वास ननावरे यांनी माहिती दिली की, कोरोना संसर्गाच्या पार्श्वभूमीवर 23 मार्चपासून राज्यभरातील नाभिक समाजाची सलूनची दुकाने आजपर्यंत बंद आहेत. त्यामुळे नाभिक समाजाची मोठी कुचंबना झाली असून, अनेकांवर उपासमारीची वेळ आली आहे. मात्र, या दरम्यान सरकारकडून कोणत्याही प्रकारची मदत करण्यात आली नाही. मदतीसाठी 20 एप्रिल रोजी सरकारकडे निवेदन दिलेले आहे. मात्र, त्यावर कोणत्याही प्रकारे कार्यवाही झाली नाही. त्यामुळे 5 जून रोजी पुन्हा स्मरणपत्र देण्यात आले व त्यामध्ये 8 जून रोजी निर्णय न झाल्यास 9 जून रोजी नाभिक समाज रस्त्यावर उतरुन आंदोलन करेल, असा ईशारा देण्यात आला होता. मात्र, आठ जून रोजी काहीही निर्णय झाला नाही.
 त्यामुळे नाभिक समाजास आंदोलन करावयास भाग पडत आहे. 

पुण्याच्या इतर बातम्या वाचण्यासाठी येथे क्लिक करा

नाभिक समाजाच्या वतीने उद्या राज्यातील सर्व जिल्हाधिकारी व तहसील कार्यालयासमोर शांततेच्या मार्गाने सोशल डिस्टन्सिंगचे नियम पाळत तोंडावर मास्क लावून आंदोलन करण्यात येत आहे. या आंदोलनात नाभिक समाजाचा प्रत्येक नागरिक समोर पोते (गोणपाट) टाकून त्यावर व्यवसायाचे सर्व साहित्य
 (धोपटी) ठेवणार आहे. तसेच, अंगावरील शर्ट काढून अर्धनग्न होऊन कपाळावर काळी रिबिन बांधून कोणत्याही घोषणा न देता हातात छोटे फलक घेऊन आंदोलन करणार आहे. या दरम्यान आलेल्या राजकीय पदाधिकारी व शासकीय अधिकारी यांना निवेदन देऊन नाभिक समाजाच्या व्यथा मांडणार असल्याचे ननावरे यांनी सांगितले आहे.