पुणे : छातीमध्ये असह्य वेदना होऊ लागल्याने रिक्षाचालकाने रस्त्याने जाणाऱ्या तीन वाहतूक पोलिसांना मदत मागितली. वाहतूक पोलिसांनीही क्षणाचाही विलंब न करता, त्या रिक्षाचालकास दुसऱ्या रिक्षात बसवून तत्काळ वाडिया कॉलेजजवळील कॅनोट प्लेस ते ससूनमध्ये अवघ्या 4 मिनिटांत पोचविले. ससूनमध्येही डॉक्‍टरांनी तत्काळ उपचार सुरू केले. वाहतूक पोलिसांच्या रूपाने धावून आलेल्या देवदूतांनी माणुसकी दाखवत रिक्षाचालकास जीवदान दिले. 

ताज्या बातम्यांसाठी डाऊनलोड करा ई-सकाळचे ऍप

अशोक राजाराम वाडेकर असे संबंधित रिक्षाचालकाचे, तर पोलिस नाईक मिनीनाथ भागवत, पोलिस शिपाई राहुल ढमढेरे व पोलिस नाईक विनोद कायगुडे असे वाहतूक पोलिसांचे नाव आहे. तिघेही कोरेगाव पार्क वाहतूक विभागामध्ये कार्यरत आहेत. 10 ऑक्‍टोबरला सकाळी साडेनऊच्या सुमारास पोलिस कायगुडे, भागवत व ढमढेरे असे तिघे जण वाडिया कॉलेजच्या दिशेने जाताना त्यांच्याकडे कॅनॉट प्लेसजवळ एका रिक्षाचालकाने मदत मागितली. त्यांच्या छातीत वेदना होत असल्याने पोलिसांनीही त्यांना तत्काळ रिक्षात बसवून ससूनला हलविले. अद्ययावत दुचाकीच्या सायरनमुळे वाहतूक कोंडीचा अडथळा दूर होऊन ते अवघ्या चार मिनिटांतच ससूनला पोचले. 

जितेंदर सुशीलचे दरवाजे बंद करणार?

दरम्यान, कागदपत्रांची तांत्रिक प्रक्रिया नंतर करू, अगोदर रुग्णाचे प्राण वाचवा, असे पोलिसांनी डॉक्‍टरांना सांगितले. त्यानंतर डॉक्‍टरांनीही तत्काळ उपचाराला सुरुवात केली. रुग्णाला योग्य वेळी मदत मिळवून दिल्याचे डॉक्‍टरांनी सांगितले. तोपर्यंत वाडेकर यांच्या मुलालाही बोलावण्यात आले. या घटनेतून बरे झाल्यानंतर वाडेकर व त्यांच्या कुटुंबीयांनी पोलिस आयुक्त डॉ. के. वेंकटेशम यांची भेट घेऊन पोलिसांच्या रूपाने मदतीला धावून आलेल्या देवदूतांच्या सहकार्याबद्दल आभार मानले. 

छातीत कळा येऊ लागल्याने पोलिसांना मदत मागितली. त्यांनी मला उचलून दुसऱ्या रिक्षात ठेवले. ससूनला नेऊन चांगले उपचार केले. पोलिसांच्या मदतीमुळेच आज मी जिवंत आहे. 

- अशोक वाडेकर, रिक्षाचालक