वेल्हे,(पुणे ) : राजगड ,तोरणा भागासह रायगड जिल्ह्यालगत काल रात्री पासून अतिवृष्टी सुरू आहे. गेल्या चोवीस तासात ११३ मिलिमीटर पावसाची नोंद झाली आहे. त्यामुळे पर्यटक तसेच नागरिकांनी आवश्यक खबरदारी घ्यावी. दरडींचा धोका असलेल्या ठिकाणी जाऊ नये तसेच धबधबे, गडकोटांवर साहसी क्रीडा करु नये असे आवाहन वेल्हे तालुका तहसीलदार दिनेश पारगे यांनी केले आहे.

या बाबत तहसीलदार पारगे यांनी पुरातत्व विभाग व पोलीस विभागाला पत्र देऊन पर्यटकांच्या सुरक्षेसाठी उपाययोजना करण्याची सुचना दिल्या आहेत. गेल्या २४ तासात वेल्हे येथे विक्रमी ११३ मिलीमीटर पाऊस पडला. या पेक्षा दुप्पट पाऊस रायगड जिल्ह्यालगतच्या मढे घाट, घोल दापसरे खोऱ्यात कोसळत आहे. त्यामुळे नद्या ओढे नाल्यांना पुर आले आहेत.

पावसाळी पर्यटनासाठी पर्यटक मोठ्या संख्येने गर्दी करत असलेल्या राजगडावर शनिवारी (२२) पासून कड्याच्या दरडी कोसळत आहेत. सुरक्षेसाठी पुरातत्व विभागाने उभ्या केलेले बॅरिकेड्स काढून पर्यटक राजगडाच्या बालेकिल्ल्यावर धाव घेतली.

कड्याची दरड कोसळल्याने सुरक्षेसाठी पुरातत्व विभागाने बालेकिल्ल्याचा मार्ग केला होता. मात्र सायंकाळीच बॅरिकेड्स लावुन बंद करण्यात आला होता. मात्र बॅरिकेड्स काढून पर्यटकांनी धाव घेत आहेत. गडावर पुरेशी सुरक्षा व्यवस्था नाही.

पुरातत्व विभागाचे दोन पाहरेकरी व दोन खाजगी सुरक्षा रक्षक नेमण्यात आले आहेत. मात्र सुट्टीच्या दिवशी पाच ते सहा हजारांवर पर्यटकांची गर्दी असते त्यामुळे सुरक्षा व्यवस्था अपुरी पडत आहे. वेल्हे तालुका तहसीलदार दिनेश पारगे म्हणाले,

राजगडावर दरडी कोसळण्याचा घटना घडली. त्यामुळे पर्यटकांनी पुरातत्व विभागाने मनाई केलेल्या भागात जाऊ नये. वेल्हे हा डोंगरी दुर्गम तालुका आहे. सध्या जोरदार पाऊस पडत आहे. त्यामुळे पर्यटकांनी तोरणा गड व इतर भागात आवश्यक खबरदारी घ्यावी.