मंचर : “देश पातळीवर काम करणार्या कैलाश सत्यार्थी चिल्ड्रन्स फाउंडेशनने बचपन बचाओ आंदोलनाच्या माध्यमातून देशात एक लाखापेक्षा जास्त मुलामुलींची बाल शोषण, बाल कामगार व बाल तस्करीतून सुटका केली आहे. संस्थेच्या कामाची दखल घेऊन सर्वोच्च न्यायालयाने न्यायनिवाडे दिले आहेत.

नोबेल पुरस्कार मिळालेल्या या संस्थेबरोबर मंचर (ता.आंबेगाव) येथील ज्ञानशक्ती विकास वाहिनी संस्थेने एकत्रितपणे काम सुरु केले आहे. त्याचा फायदा निश्चित पोलीस दलाला होणार आहे. “भरोसा सेल”च्या माध्यमातून लहान मुले व महिलांमध्ये जनजागृती व प्रबोधन करण्यासाठी या संस्थांची मदत पुणे ग्रामीणमधील सर्व पोलीस ठाण्यातून घेतली जाईल.” असे पुणे ग्रामीण पोलीस अधीक्षक डॉ.अभिनव देशमुख यांनी सांगितले.

मंचर (ता.आंबेगाव) येथे उपजिल्हा रुग्णालयात कैलाश फाउंडेशन व ज्ञानशक्ती संस्थेने एकूण आठ लाख रुपये किमतीचे ३० ग्रामपंचायतीना व उपजिल्हा रुग्णालयाला कोविड कीटचे वाटप डॉ. देशमुख यांच्या हस्ते केले. यावेळी भीमाशंकर कारखान्याचे अध्यक्ष बाळासाहेब बेंडे, पराग मिल्क फुड्सचे कार्यकारी संचालक प्रीतम शहा, पुणे जिल्हा परिषदेचे माजी उपाध्यक्ष विवेक वळसे-पाटील, अरुणा दत्तात्रय थोरात, सभापती संजय गवारी, पंचायत समिती सदस्य राजाराम बाणखेले, गटविकास अधिकारी जालिंदर पठारे उपस्थित होते.

विवेक वळसे पाटील म्हणाले “गेली १६ वर्ष महिलांचे विविध प्रश्न सोडविण्याबरोबरच पाणलोट क्षेत्र विकासातही ज्ञानशक्ती विकास वाहिनीचे मोठे योगदान आहे. यापुढे गार्गी विशाल काळे पाटील यांच्या माध्यमातून मुलामुलीना योग्य प्रबोधन करण्याचे काम संस्था चांगल्या पद्धतीने करेल असा. विश्वास आहे.”

प्रीतम शहा म्हणाले “ दुध व्यवसायात व सेंद्रिय शेती बाबत महिलामध्ये जनजागृती होण्यासाठी ज्ञानशक्तीने पुढाकार घ्यावा. त्यासाठी पराग मिल्क फूड्स व भाग्यलक्ष्मी डेअरी फार्मतर्फे संस्थेला सर्व प्रकारचे सहकार्य केले जाईल.”

ज्ञानशक्ती विकास वाहिनी संस्थेच्या कार्यकारी संचालिका गार्गी विशाल काळे पाटील म्हणाल्या “ राज्याचे गृहमंत्री दिलीप वळसे पाटील यांचे पाठबळ व मार्गदर्शन मिळाल्यामुळे संस्थेने महिला व बाल सक्षमीकरण क्षेत्रात काम केले आहे.यापुढे शाळा महाविद्यालयात जनजागृतीचे काम केले जाईल. कैलास फाउंडेशनचे प्रकल्प समन्वयक प्रसाद ताठे यांनी स्वागत केले. शहा, वळसे पाटील, डॉ. देवमाने,डॉ. सुदाम खिलारी यांची मनोगते झाली.

“काही एनजीओ फक्त फोटो काढण्यापुरते कार्यक्रम घेतात. अनुदान मागतात व सरकारची कामे आम्हीच केली असे दाखवतात. पण गेली १६ वर्ष महिला सक्षमीकरण व लहान मुलांसाठी ज्ञानशक्ती विकास वाहिनी संस्था अत्यंत प्रभावीपणे काम करत आहे. संस्थेने आदिवासी भागात अधिक लक्ष द्यावे. त्यासाठी पोलीस दलाची मदत मिळेल.”- डॉ.अभिनव देशमुख, पोलीस अधीक्षक पुणे ग्रामीण