खेड-शिवापूर : कोल्हापूरातील सांगली फाटा येथील पुणे बंगळुरू महामार्गावर पुराचे पाणी आल्याने येथून पुढे जाणारी वाहतूक बंद आहे. त्यामुळे पुण्याहून पुणे-सातारा महामार्गाने कोल्हापूर आणि सांगलीकडे जाणारी वाहतूक थांबविण्यात आली आहे. महामार्ग पोलिसांकडून खेड-शिवापूर टोल नाक्यावरून कोल्हापूर सांगलीकडे निघालेल्या वाहनांना मागे वळविण्यात येत आहे.

कोल्हापूर जिल्ह्याला पूराने वेढले आहे. या पुराचे पाणी कोल्हापुरात सांगली फाट्यावर बंगळुरूकडे जाणाऱ्या रस्त्यावर आले आहे. त्यामुळे तेथून पुढे जाणारी वाहतूक बंद आहे. या पार्श्वभूमीवर पुण्याहून कोल्हापूर आणि सांगलीकडे पुणे-सातारा महामार्गावरून जाणाऱ्या वाहनांना पुणे-सातारा रस्त्यावरील खेड-शिवापूर टोल नाक्यावरून पुढे सोडले जात नाही.

महामार्ग पोलिसांचे पथक खेड-शिवापूर टोल नाक्यावरून कोल्हापूर आणि सांगलीकडे जाणारी वाहने अडवून त्यांना माघारी पाठवत आहेत. येथून फक्त साताऱ्यापर्यंत जाणाऱ्या वाहनांनाच पुढे सोडण्यात येत आहे. त्यामुळे मालवाहतूक करणारे ट्रक रस्त्याच्या बाजूला वाहने उभी करून थांबत होते. तर कार आणि इतर लहान वाहनांमधील नागरीक पुन्हा माघारी फिरताना दिसून येत होते.

याबाबत महामार्गचे सहाय्यक पोलिस निरीक्षक प्रवीण रणदिवे म्हणाले, "कोल्हापूर येथे पुराचे पाणी रस्त्यावर आल्याने कोल्हापूर आणि सांगलीकडे जाणारी वाहतूक थांबविण्यात आली आहे. खेड-शिवापूर टोल नाक्यावरूनच कोल्हापूर आणि सांगलीकडे जाणारी वाहने मागे वळविण्यात येत आहेत. सदर परिस्थिती पाहता नागरीकांनीही कोल्हापूर, सांगलीकडे जाणे टाळावे."