पुणे - शिक्षणाचा ऐतिहासिक वारसा जतन करणाऱ्या फर्ग्युसन महाविद्यालयात स्थानिक आणि स्थलांतरित पक्षांच्या ८८ प्रजातींचा अधिवास असल्याची माहिती नुकत्याच केलेल्या पक्षी निरीक्षणातून पुढे आली. दरवर्षी ‘ग्लोबल ग्रेट बॅकयार्ड बर्ड काउंट’ या उपक्रमातून सभोवतालच्या परिसरातील पक्षी आणि त्यांच्या वैशिष्ट्यांची नोंद केली जाते. फर्ग्युसनमध्ये या उपक्रमाअंतर्गत फेब्रुवारी महिन्यात पक्षी निरीक्षण करण्यात आले.

असे झाले निरीक्षण..

- महाविद्यालयातील १४० प्रशिक्षीत विद्यार्थ्याचा सहभाग

- निरीक्षणासाठी आवारातील १५ ठिकाणे निश्चित करण्यात आली

- सकाळी साडेपाच ते रात्री साडेसात यावेळेत गटा-गटाने निरीश्रण

- प्रत्येकी १५ मिनीटाने १४०० निरीक्षणे नोंदविली गेली.

- माहिती www.ebird.org या ॲपवर अपलोड करण्यात आली

फर्ग्युसनच्या आवारातील पक्षी..

कावळे, कबुतर, मैना, घारी, बुलबुल, कोकीळ, पोपट, घुबड, पिंगळा, राखी धनेश या स्थानिक पक्षांसह सरडामार गरूड, निळी माशीमार, लाला छातीचा माशीमार, लाल कंठाचा माशीमार, हिरवट वटवट्या, मुकुटधारी पर्णवटवट्या, कृष्ण थिरथिरा, करड्या डोक्याची मैना या वैशिष्ट्यपूर्ण अधिवासाची गरज असणाऱ्या स्थलांतरीत पक्षांची नोंद करण्यात आली. बहुसंख्य स्थलांतरीत पक्षी दरवर्षी हिवाळ्यात हिमालयातून येत असतात.

वैशिष्ट्यपूर्ण निरीक्षणे

- विविध ८८ पक्षांच्या प्रजाती

- निळी माशीमार या जंगलात आढळणाऱ्या पक्षाने शहरात अधिवास केला

- लाल फुलांच्या काटेसावर झाडावर करड्या डोक्याची मैना आढळली

- दोन हजार पोपटांचा थवा

पुणे शहरातील टेकड्या हे गवताळ प्रदेश होते. या ठिकाणी बोरबाभूळ अशी वृक्षसंपदा होती. कालांतराने या टेकड्यांवर ग्लिसरिडीया, निलगिरी, सुबाभूळ अशी वृक्ष लागवड करण्यात आली. फर्ग्युसन परिसरातील टेकड्यांवरही हे बदल झाले. या बदलांसह या परिसरातील वृक्षसंपदा, प्राणी, पक्षी, सरपटणारे प्राणी यांचा एकत्रित अभ्यास करणे आवश्यक वाटते.

- प्रा. अविनाश मुंजे, फर्ग्युसन महाविद्यालय