पुणे - बाजार समितीमधील परवानाधारक पथारी व्यावसायिकांच्या टपऱ्या बंद करण्याचा आदेश समितीने दिला आहे. या निर्णयाविरोधात परवानाधारकांनी कृषी बाजार उत्पन्न समितीच्या कार्यालयासमोर धरणे आंदोलन सुरू केले आहे. या आंदोलनास पथारी व्यावसायिक पंचायतचे अध्यक्ष बाबा आढाव यांनी भेट देऊन पाठिंबा दिला आहे. या वेळी, पथारी व्यावसायिक पंचायतचे सरचिटणीस बाळासाहेब मोरे, संतोष नांगरे, हनुमंत बहिरट, वसंत चोरगे आणि पथारी व्यावसायिक उपस्थित होते.

आढाव म्हणाले, 'पथारी व्यावसायिकांचे हातावर पोट असूनही त्यांच्या विरोधात कारवाई केली जात आहे. गेल्या 38 वर्षांपासून येथे व्यवसाय करणाऱ्या पथारी व्यावसायिकांना प्रशासनाने नेहमीच दुय्यम दर्जाची वागणूक देऊन त्यांच्यावर अन्याय केला आहे.'' सरकार रोजगार निर्माण करणार म्हणत असताना या लोकांचा व्यवसाय का बंद केला जात आहे, असा सवालही आढाव यांनी उपस्थित केला.

कृषी बाजार उत्पादन समिती प्रशासक बाळासाहेब देशमुख म्हणाले, 'रस्त्यावर टपऱ्या असल्याने सतत वाहतूक कोंडी होते. पथारी व्यवसायिकांना कित्येक वर्षांपासून टपऱ्यांसाठी जागा दिली असून, यापुढे त्यांनी पर्यायी व्यवस्था करणे गरजेचे आहे. तसेच, पथारी व्यवसायिकांनीही इतरांचा विचार करून भूमिका बदलण्याची गरज आहे.''

या परिसरात 1982 पासून चहाची टपरी आहे. चहाच्या व्यवसायावर कुटुंबाचा उदरनिर्वाह चालतो. परंतु, बाजार समितीने अधिकृत परवाना असताना टपऱ्या बंद करण्याचा आदेश दिला आहे, यामुळे रोजंदारीचा प्रश्‍न निर्माण झाला आहे. नियमित कर भरूनही आमच्यावर कारवाई केली जात आहे.
- बाळासाहेब गिधे, पथारी व्यावसायिक