नवी सांगवी (पुणे) - दापोडी येथील प्रतिभा महिला प्रतिष्ठान संचलित 'द न्यू मिलेनियम इंग्लिश मीडियम स्कूल'मध्ये दहावी व बारावीत विशेष नैपुण्य संपन्न केलेल्या विद्यार्थी आणि पालकांचा कौतुक सोहळा नुकताच पार पडला. यावेळी महाराष्ट्र राज्य लोकसेवा आयोगाच्या परीक्षेत सलगपणे तीन वर्षे उपजिल्हाधिकारी पदासाठी यश संपादन करणाऱ्या रोहिणी योगेश विरोळे पाटील यांच्या हस्ते विद्यार्थ्यांना गौरविण्यात आले. याप्रसंगी संस्थेचे सचिव शंकर जगताप, सदस्या स्वाती पवार, प्राचार्या इनायत मुजावर, पर्यवेक्षिका उषा साळवी व शिक्षक पालक वर्ग उपस्थित होता. 

इयत्ता दहावीतील स्नेहल कुडोंबे (96.80), तन्वी दपके (96.20), आरती खैरकर (95.60) तसेच बारावीतील सायन्स शाखेतील गुणवंत विद्यार्थी प्रियांका भोर(75.38), दुर्गा चौधरी (68.61), प्रशांत आगेडा (68) व वाणिज्य शाखेतील उमेरउमानी खान (81.38), करण राणे (74.77), निकीता मँथ्यू (73.54) हे सर्व विद्यार्थी व पालकांचा गुणगौरव करण्यात आला. उपजिल्हाधिकारी विरोळे पाटील यांनी कठीण मेहनत परिश्रम, सातत्य एखाद्या गोष्टीचा ध्यास, संघर्ष, व त्यातून मिळणारे यश, परिवाराची साथ, गुरूजनाचे मार्गदर्शन याविषयी आपले मनोगत व्यक्त करून विद्यार्थ्यांना पुढील भावी जीवनासाठी शुभेच्छा दिल्या. 

या सर्व यशस्वी विद्यार्थ्यांचे संस्थेचे उपाध्यक्ष विजय जगताप, संचालक मंडळ सदस्य चंद्रकांत इंदूरे, डॉ विकास पवार, प्रताप बामणे, पर्यवेक्षिका उषा साळवी आदींनी अभिनंदन केले.