हडपसर : सातववाडी येथील साईनगर सोसायटीच्या तळमजल्यातील भन्नाट बिर्याणी या हॉटेलमध्ये आग लागून नुकसान झाले. पाहटे तीन वाजण्याच्या सुमारास ही घटना घडली. सुदैवाने हॉटेलमध्ये कोणी राहत नसल्याने जिवीतहानी टळली.

येथील रस्त्यालगत असलेल्या साईनगर इमारतीमध्ये अमित अदमानी यांचे दुकान असून त्यांनी ते केतन शिंदे यांना भन्नाट बिर्याणी या हॉटेल व्यवसायासाठी भाडेकराराने दिले आहे. आज (ता.११) पाहटे तीन वाजण्याच्या सुमारास या हॉटेलमधून धूर येत असल्याचा फोन अग्निशमन केंद्रात आला होता.

तात्काळ काळेबोराटेनगर, हडपसर व कोंढवा येथून अग्निशमन दलाची वाहने येऊन आगीवर नियंत्रण मिळविले. जवानांनी दुकानातून एक कमर्शियल, एक रेसिडेन्शियल व एक पाच किलोचा सिलेंडर बाहेर काढला. या आगीत एका सिलेंडर फुटले आहे.आगीमध्ये फ्रिज, पाण्याच्या दोन टाक्या, पातेले, शेगडी, टेबल, काउंटर, खुर्च्या इत्यादी वस्तूंचे नुकसान झाले आहे. आगीचे नेमके कारण समजू शकले नाही.

काळे बोराटेनगर अग्निशामन केंद्रप्रमुख अनिल गायकवाड, राजू शेख, नारायण जगताप, फायरमन अनिमेश कोंडगेकर, केतन घाडगे, संकेत शिंदे, बाबासाहेब चव्हाण, चंद्रकांत नवले यांनी आगीवर नियंत्रण मिळविले.