पुणे : शहरातील एका बांधकाम व्यावसायिकाच्या घरी 6 लाख 70 हजार रुपयांची फिल्मी स्टाइल चोरी करण्यात आली. ही घटना मंगळवारी दुपारी वसंतबाग सोसायटीमध्ये घडली. चोरी करणारे आरोपी सीसीटीव्हीमध्ये कैद झाले आहे. त्यांचा शोध घेण्यासाठी बिबवेवाडी पोलिसांची पथके रवाना झाली आहेत. बांधकाम व्यावसायिकाचा मुलगा तेजस प्रवीण दुगड (वय 29) यांनी याबाबत फिर्याद दिली आहे. 

हे ही वाचा : सराईत चोरट्यांना अटक; 29 लाखाचा मुद्देमाल जप्त, घरफोडीचे सात तर पाच वाहन चोरीचे गुन्हे उघडकीस

याबाबत पोलिसांनी दिलेल्या माहितीनुसार, फिर्यादी तेजस आणि त्याच्या भावाचा बंगला शेजारी-शेजारी आहे. तेजस व त्यांचे कुटुंबीय कामानिमित्त बाहेर गेले होते. यावेळी त्यांच्या घरामध्ये एक चोरटा घुसला होता. त्याने वरच्या मजल्यावरील कपाटाच्या ड्रॉवरमधून 6 लाख 70 हजाराची रोकड चोरली व एका बॅगेत भरली. बॅगेसह खाली उतरता येत नसल्याने त्याने ती बॅगवरून खाली टाकली. मात्र ती नेमकी फिर्यादींच्या भावाच्या घराच्या व्हरांड्यात पडली. ती बॅग फिर्यादींच्या भावाच्या घरातील आचारी देवजी सोळंकी यांना सापडली. त्यांनी ती तातडीने तेजस यांची वहिनी मोनल दुगड यांच्याकडे दिली. त्यामुळे बॅग आणण्यासाठी चोरटा फिर्यादींच्या भावाच्या घरी गेला. 

हे ही वाचा : पुण्याच्या बातम्या वाचण्यासाठी येथे क्लिक करा 

माझ्या आत्याची बॅग तुमच्या घरात पडली आहे. ती मला द्या, अशी मागणी चोरट्याने सोळंकी यांच्याकडे केली. ही बाब सोळंकी यांनी मोनल यांना सांगितली. त्यानंतर त्या बॅग घेऊन घराबाहेर आल्या. मात्र त्यांनी चोरट्याला बॅग हवी असेल तर तुझी ओळख सांग, खात्री पटल्यावरच आम्ही बॅग देऊ असे सांगितले. यामुळे चोरट्याने त्यांच्या हातातील बॅग हिसकावत पळ काढला. त्याला मोनल यांच्या वाहनचालकाने अडवले. चोरट्याने वाहनचालकला हाताने मारहाण करत घराबाहेर पळ काढला. तेथे त्याचा एक साथीदार दुचाकीवर उभा होता. त्याच्या दुचाकीवरून दोघे पसार झाले.

वरिष्ठ पोलिस निरीक्षक कुमार घाडगे म्हणाले, बांधकाम व्यावसायिकाच्या दोन्ही मुलांचे बंगले एकमेकांशेजारी आहेत. यातील तेजस यांच्या घरातील रोकड चोरल्यावर आरोपीने बॅग खाली टाकली होती. मात्र ती नेमकी तेजस यांच्या भावाच्या घरात पडली. ही बॅग स्वतः:ची असल्याचा बहाणा करत चोरट्याने मोनल यांच्या हातातून बॅग हिसकावली. आरोपीच्या मागावर पोसिलांची पथके रवाना करण्यात आली आहे.