पुणे - महापालिकेने विस्तारीकरणासाठी कोट्यवधी रुपये खर्च करून नवी इमारत बांधली, परंतु अपंगांच्या रॅम्पकडे दुर्लक्ष केले आहे. सध्याच्या रॅम्पची दुरवस्था झाली असून, तातडीने नवा कायमस्वरूपी रॅम्प उभारावा, अशी मागणी सामाजिक कार्यकर्त्या कनीज सुखरानी यांनी महापालिका आयुक्त सौरभ राव यांच्याकडे एका निवेदनाद्वारे केली आहे. 

दैनंदिन कामासाठी महापालिकेत येणाऱ्या अपंगांची संख्या मोठी आहे. केंद्र आणि राज्य सरकारच्या नव्या नियमानुसार शासकीय इमारतींमध्ये व्हिलचेअरवरून येणाऱ्या नागरिकांसाठी रॅम्प उभारणे बंधनकारक आहे. नव्या इमारतीसाठी महापालिकेने सुमारे ३५ कोटी रुपये खर्च केले आहेत. परंतु, अपंगांच्या रॅम्पकडे दुर्लक्ष केले आहे. जुन्या इमारतीमध्ये लाकडी फळ्या उभारून रॅम्प उभारण्यात आला आहे. त्यावरील कार्पेटही फाटले आहे. तसेच त्याचीही दुरवस्था झाली आहे. त्यामुळे त्याचा वापर करणे धोकादायक झाले आहे. त्याची दखल घेऊन अपंगांसाठी कायमस्वरूपी आणि सुरक्षित रॅम्प उभारावा, असे सुखरानी यांनी निवेदनात म्हटले आहे.