तारापूरच्या हॉटेलमधून
अवैध दारूसाठा जप्त

आंबे, ता. ७ ः रंगपंचमी आणि रमजानच्या पार्श्वभूमीवर अवैध दारू विक्री व साठा केल्याप्रकरणी तारापूर (ता. पंढरपूर) येथील हॉटेल रविराजवर पोलिसांनी छापा टाकून कारवाई केली. कारवाई दरम्यान १६ हजार रुपये किमतीचा अवैध देशी-विदेशी दारूचा साठा जप्त करण्यात आला. याप्रकरणी पंढरपूर तालुका पोलिस ठाण्यात हॉटेल मालक व चालकाविरोधात मुंबई दारूबंदी कायदा कलम ६५ प्रमाणे आरोपी विरोधात गुन्हा दाखल करण्यात आला आहे.
येथील हॉटेलमध्ये अवैध दारू विक्रीसाठी साठा केल्याची माहिती पोलिसांना मिळाली होती. त्यानुसार प्रतिबंधात्मक उपाययोजना म्हणून पोलिसांनी शुक्रवारी रात्री हॉटेलवर छापा टाकून कारवाई केली. देशी विदेशी दारूसह विविध कंपन्यांच्या बियरचा साठा आढळून आला. पोलिसांनी दारू साठ जप्त केला आहे. ही कारवाई पोलिस अधीक्षक अतुल कुलकर्णी, उपविभागीय पोलिस अधिकारी प्रशांत डगळे यांच्या मार्गदर्शनाखाली पोलिस निरीक्षक टी.वाय मुजावर व त्यांच्या टीमने केली.