महर्षीनगर (पुणे)  : सर्वसामान्य नागरिकांच्या खिशातून कररूपी वापरला जाणारा पैसा स्थानिक नगरसेवक आपली जाहिरात करण्यासाठी वापरत असतील तर ते दुर्दैवी आहे. जनतेचे प्रश्न केंद्रस्थानी ठेवून विकासकामे झाली पाहिजेत याच उद्देशाने प्रतिनिधीनी काम करणे अपेक्षित असते. मात्र, प्रभाग क्रमांक २८ मध्ये वीसहुन अधिक ठिकाणी बेकायदेशीर वीज जोडणी स्थानिक नगरसेवकांकडून करण्यात आल्याचे उघड झाले आहे, यामध्ये शिवनेरी रस्त्यावरील कृषी उत्पन्न बाजार समिती फलक, महानगरपालिकेच्या शाळा, दिशादर्शक, हाईड पार्क सोसायटी, उड्डाणपूल, बस थांबे, क्षेत्रिय कार्यालय फलक अशा अनेक फलकांचा समावेश आहे. या सर्व फलकांच्या खाली माननीयांनी स्वतःचे नाव लावून जाहिरातबाजी केली असल्याचे पाहायला मिळत आहे.

पुणे : मारटकर खून प्रकरणी कुख्यात गुंड बापू नायरला अटक 

सामान्य नागरिकांनी अनधिकृतपणे वीज जोडणी केली तर त्यांना दंड आकारला जातो व नगरसेवकांनी जर ही चूक केली तर त्यांनाही दंड आणि शिक्षा मिळायलाच हवी, शहरासह प्रभागात दिशादर्शकांचा सुळसुळाट झाला आहे, गेल्या अनेक वर्षांपासून स्थित वास्तूना संकल्पना माननीयांचे असल्याचे आश्चर्यकारक फलक लागले आहेत. या प्रकरणी आम्ही न्यायालयात जाणार असल्याची माहिती सचिन शिंगवी यांनी दिली. या निमित्ताने नगरसेवकांचा पुन्हा एकदा मनमानी कारभार समोर आला आहे. बिबवेवाडी क्षेत्रिय कार्यालय विद्युत विभागाच्या प्रमुख मेघा ढगे यांच्याशी संपर्क साधला असता त्यांनी प्रतिक्रिया देण्यास टाळाटाळ केली. 

पुण्याच्या बातम्या वाचण्यासाठी येथे ► क्लिक करा 

 

प्रभाग २८ मधील काही डिजिटल फलकाचे बिल महानगरपालिका भरते. तर काही बोर्डचे बिल वैयक्तिक भरत आहोत, तृप्ती हॉटेल जवळील दिशाफलकाचे बिल आम्ही वैयक्तिक भरत आहोत, काही फलकांचे बिल महानगरपालिका भरत आहे.

- श्रीनाथ भिमाले, नगरसेवक प्रभाग २८ ( ब ), माजी सभागृह नेते, पुणे महानगरपालिका 

 

स्मार्ट सिटीच्या नावाखाली स्वतःची जाहिरात केलेली स्पष्ट दिसत आहे आणि बेकायदा वीज जोडणीचे काही पुरावे देखील आता समोर आले आहेत. वैयक्तिक बिल भरण्यात आलेल्या पावत्या असतील तर त्या सर्व पावत्या दाखविण्यात याव्यात.

- एकनाथ ढोले, वाहतूक सेना जिल्हाध्यक्ष, शिवसेना