पुणे - किवळे येथे होर्डींग पडून नागरीकांचा मृत्यु झाल्याच्या घटनेनंतर जाग आलेल्या महापालिका प्रशासनाने अखेर अनधिकृत होर्डींग्सविरुद्ध कारवाईचा बडगा उगारला. शहराच्या वेगवेगळ्या भागातील 21 होर्डींग्स समवेत 239 हून अधिक फ्लेक्‍स, बॅनर, बोर्ड महापालिकेच्या पथकांनी काढून टाकले. विनापरवाना जाहीरात होर्डींग व बोर्ड लावणाऱ्यांविरुद्ध महापालिकेने गुन्हा दाखल केले आहे.

किवळे येथे होर्डींग पडून झालेल्या अपघातामध्ये पाच नागरीकांचा मृत्यु झाल्याची दुर्घटना सोमवारी घडली. त्यानंतर पिंपरी चिंचवड महापालिकेने त्वरीत अनधिकृत होर्डींग्सविरुद्ध कारवाई करण्यास सुरुवात केली. तर पुणे महापालिकेने देखील बुधवारपासून अनधिकृत होर्डींग्सविरुद्ध कडक भुमिका घेत होर्डींग्स काढून टाकण्याच्या कारवाईला सुरुवात केली. बुधवारी सकाळपासूनच शहराच्या विविध भागांमध्ये होर्डींग्स, फ्लेक्‍स विरुद्धची कारवाई करण्यास सुरुवात झाली.

महापालिकेच्या परवाना व आकाशचिन्ह विभागाचे उपायुक्त माधव जगता यांच्या मार्गदर्शनाखाली महापालिकेच्या 15 क्षेत्रीय कार्यालयाअंतर्गत हि कारवाई करण्यात आली. होर्डींग्स 21, बोर्ड, बॅनर फ्लेक्‍स 173, झेंडे 13, पोस्टर 21, किऑक्‍स 15 असे एकूण 239 होर्डींग्स, फ्लेक्‍स काढून टाकण्यात आले. या कारवाईमध्ये 5 क्रेन, 40 बिगारी सेवक, 6 गॅस कटर, 5 वेल्डर अशा मनुष्यबळ व यंत्रसामुग्रीचा समावेश करण्यात आला.

दरम्यान, विना परवाना जाहीरात होर्डींग्ज व बोर्ड लावणाऱ्यांविरुद्ध महापालिकेने कडक कारवाई करीत त्यांच्या विरुद्ध गुन्हे दाखल करण्याची प्रक्रिया केली. दरम्यान, शहराच्या वेगवेगळ्या भागात दररोज बेकायदा होर्डींग्स, फ्लेक्‍स विरुद्धची कारवाई अधिक कडक करण्यात येणार असल्याचे जगताप यांनी स्पष्ट केले.