ओतूर, ता. ८ ः जुन्नर तालुक्याच्या पश्चिम पट्ट्यातील आदिवासी भागातील मढ-तळेरान खोऱ्यातील गाव व वाड्यावस्त्यांमधून अवैधरीत्या गौणखनिज माती, मुरूमाची वाहतूक सुरू आहे. याकडे महसूल विभाग दुर्लक्ष करत आहे, असो आरोप नागरिकांमध्ये होत आहे.

डिंगोरे गावच्या हद्दीत नगर-कल्याण महामार्गावर बुधवारी रात्रीच्या वेळेस अवैध माती वाहतूक करणाऱ्या ट्रक व मोटारीचा अपघात झाला. सुदैवाने यात जीवितहानी झाली नाही. मात्र, या अवैध गौणखनिजाची वाहतूक करणाऱ्या ट्रकमुळे हा अपघात झाला. मढ खोऱ्यातील तळेरान, सितेवाडी व इतर परिसरात तसेच खिरेश्वर व डोंगर भागांतून ही माती काढून अवैद्यरित्या नियम धाब्यावर बसवून उत्खनन केले जाते. जुन्नर तालुक्याचा हा पिंपळगाव- जोगा धरण परिसर व माळशेज पट्ट्या ईकोझोनमध्ये असून त्याठिकाणीउत्खनन करण्यास बंदी आहे. तरीही या परिसरात जेसीबी यंत्राच्या साहाय्याने उत्खनन सर्रास सुरू आहे. त्यामुळे या परिसरातील डोंगर, टेकड्या, जंगले, झाडे-झुडपे, नामशेष होऊ लागले आहेत.

कारवाई करण्याची मागणी
या अवैद्य वाहतुकीमुळे रस्त्याची वाट लागली आहे. यातून उडणारी माती व धुळीने इतर वाहनचालकांना त्रास सहन करावा लागत आहे. तरी महसुल विभागाने त्वरित या अवैध माती वाहतुकीला व उत्खननाला जबर बसवावा, अशी मागणी नागरिकांकडून होत आहे.